ۇكىمەت حالىقتىڭ تابىسىن ارتتىرۋ باعدارلاماسى اياسىندا ءبىراز شارالاردى اتقارۋعا بەكىنىپ وتىر.
نەگىزگى ماقساتتاردىڭ ءبىرى – جۇمىسشىلاردىڭ جالاقىسىن كوتەرۋ، دەپ حابارلايدى Almaty-akshamy.kz
پرەمەر-مينيستردىڭ ورىنباسارى ەرالى توعجانوۆ ءبىر ميلليوننان استام جۇمىسشىنىڭ جالاقىسى كوتەرىلەتىنىن مالىمدەدى.
«1،1 ميلليوننان استام جۇمىسكەردىڭ ەڭبەكاقىسىن ارتتىرۋ كوزدەلگەن. سونىڭ ىشىندە بيۋدجەت سالاسىنىڭ 850 مىڭنان اسا قىزمەتكەرلەرىنىڭ لاۋازىمدىق ايلىق اقىسى ۇلعايتىلادى. ماسەلەن، دارىگەرلەردىڭ جالاقىسى 320 مىڭنان 531 مىڭ تەڭگەگە دەيىن، ورتا مەديسينا قىزمەتكەرلەرىنىڭ جالاقىسى 173 مىڭنان 250 مىڭعا دەيىن وسەدى. پەداگوگ مامانداردىڭ جالاقىسى دا ارتادى»، - دەدى توعجانوۆ سەناتتىڭ جالپى وتىرىسىندا.
ونىڭ ايتۋىنشا، ءساۋىر ايىنان باستاپ «سامۇرىق-قازىنا» ۇلتتىق ءال-اۋقات قورى كومپانيالار توبىنىڭ 258 مىڭ وندىرىستىك پەرسونالىنىڭ جالاقىسى 5 پروسەنتتەن 48 پروسەنتكە دەيىن كوتەرىلدى.
«بۇل رەتتە جالاقىسى تومەن لاۋازىمدارعا باسىمدىق بەرىلدى. «قازپوشتا» جۇيەسىندە جۇرگىزۋشى-كۋرەردىڭ جالاقىسى 144 مىڭنان 237 مىڭ تەڭگەگە دەيىن ءوسىپ وتىر. وسىلايشا، ءقازىردىڭ وزىندە ازاماتتاردىڭ تابىسىن ارتتىرۋ بويىنشا ناقتى شارالار جۇزەگە اسىرىلۋدا»، - دەپ اتاپ كورسەتتى توعجانوۆ.
«سامۇرىق-قازىنا» قورىنا قاراستى تاعى ءتورت كومپانيادا جىلدىڭ سوڭىنا دەيىن وندىرىستىك پەرسونالدىڭ ەڭبەكاقىسى 5-18 پروسەنتكە كوتەرىلەدى.
«بۇدان بولەك، مەملەكەتتەن قولداۋ شارالارىن الاتىن ءىرى بيزنەسكە قاتىستى مىندەتتەمەلەردى بەلگىلەۋ ەسەبىنەن وندا ىستەيتىن 2،8 ميلليون قىزمەتكەردىڭ ورتاشا جالاقىسى وسەدى. اشىعىن ايتۋ كەرەك، ءبىز مۇنداي تالاپتى ءبىرىنشى رەت قويىپ وتىرمىز. بۇگىندە مەملەكەتتىڭ ۇلكەن باعدارلامالارىنا، سونىڭ مەملەكەتتىك ساتىپ الۋلارعا قاتىساتىن كوپتەگەن ءىرى كومپانيا بار. ولارمەن ناقتى كەلىسىم جاسالعان»، - دەدى ۇكىمەت باسشىسىنىڭ ورىنباسارى.
توعجانوۆ وسى ۋاقىتقا دەيىن جۇمىسشىلاردىڭ جالاقىسىن كوتەرگەن ءىرى كومپانيالاردى دا اتاپ ءوتتى. ولاردىڭ ىشىندە KAZ Minerals (15 پروسەنت)، قازازوت (20 پروسەنت)، ERG (25 پروسەنت)، قازاقمىس (30 پروسەنت) جانە تاعى باسقا كاسىپورىندار بار. جالپى، 150-دەن استام كومپانيا جالاقىنى كوتەرۋگە كەلىستى.