پارلامەنتتىك سايلاۋعا 25 ملرد تەڭگەگە جۋىق قاراجات بولىنەدى.
ۇكىمەت رەزەرۆىنەن مەرزىمىنەن بۇرىن پرەزيدەنت سايلاۋىن وتكىزۋگە 20 ملرد تەڭگەگە جۋىق، ال پارلامەنتتىك سايلاۋعا 25 ملرد تەڭگەگە جۋىق قاراجات بولىنەدى.
بۇل تۋرالى ءماجىلىس كۋلۋارىندا قارجى ۆيسە-مينيسترى تاتيانا ساۆەليەۆا ايتتى، دەپ حابارلايدى Almaty-akshamy.kz Inbusiness.kz سىلتەمە جاساپ.
«پرەزيدەنتتىك سايلاۋ 2024 جىلى جوسپارلانعان جانە ولار 2024 جىلعا ارنالعان بيۋدجەتتە قاراستىرىلعان. ءبىراق، وزگەرىستەر مەن جاڭا تاپسىرمالاردى ەسكەرە وتىرىپ، بيىل ۇكىمەت رەزەرۆىنەن اقشا بولىنەتىن بولادى. ءقازىر ورتالىق سايلاۋ كوميسسياسى ەسەپ جۇرگىزۋدە. بۇل شامامەن 20 ملرد تەڭگە. پارلامەنتتىك سايلاۋعا شامامەن بىردەي شىعىندار قاراستىرىلعان. ءبىراق ەتج (ەڭ تومەنگى جالاقى – اۆت.) كەلەسى جىلى 70 مىڭ تەڭگە بولاتىنىن ەسكەرسەك، شامامەن 25 ملرد تەڭگە بولادى»، - دەپ حابارلادى ساۆەليەۆا.
ونىڭ ايتۋىنشا، سايلاۋ شىعىندارىنىڭ ارتۋى ەڭ تومەنگى جالاقىنىڭ وسۋىنە بايلانىستى، ال سايلاۋعا بايلانىستى بارلىق شىعىستاردىڭ 90% - ى سايلاۋ كوميسسياسى مۇشەلەرىنىڭ جالاقىسى بولىپ تابىلادى. ەگەر 2019 جىلعى سايلاۋ كەزىندە ەتج 42500 تەڭگەنى قۇراسا، بۇل جولى بۇل كورسەتكىش 60 مىڭ تەڭگەگە جەتەدى. سونىمەن قاتار، ەگەر وتكەن سايلاۋدا 65 مىڭ ادام جۇمىس ىستەسە، وندا ولاردىڭ سانى 70 مىڭعا دەيىن ارتادى.