مەرەكە كۇندەرى قاۋىپسىزدىك شارالارى كۇشەيتىلەدى

كولىكتەگى پوليسيا دەپارتامەنتى قاۋىپسىزدىك شارالارىن جۇرگىزەدى 

كولىكتەگى پوليسيا دەپارتامەنتىنىڭ جەكە قۇرامى بيىلعى جىلعى 7-10 مامىر ارالىعىندا ەلىمىزدىڭ تەمىر جول جانە اۋە ۆوكزالدارىندا، سونداي-اق جولاۋشىلار پوەزدارىندا قاۋىپسىزدىك شارالارىن كۇشەيتەدى. بۇل «وتان قورعاۋشىلار كۇنى» جانە «جەڭىس كۇنى» مەرەكەلەرىمەن بايلانىستى قولعا الىنعان شارا. بۇل تۋرالى دەپارتامەنت باستىعى وڭال بەكەيەۆ ءمالىم ەتتى، دەپ حابارلايدى Almaty-akshamy.kz Inform.kz-كە سىلتەمە جاساپ.

ونىڭ ايتۋىنشا، مەرەكە كۇندەرى اۋە جانە تەمىرجول كولىگىندەگى جولاۋشىلار اعىنى ەكى ەسەگە ارتادى. وسىعان بايلانىستى، كولىك پوليسەيلەرى قۇقىقتىق ءتارتىپتى، ازاماتتاردىڭ قاۋىپسىزدىگى مەن تىنىشتىعىن قامتاماسىز ەتۋ، سونداي-اق قۇقىق بۇزۋشىلىقتار مەن قىلمىستاردىڭ الدىن الۋ بويىنشا ءىس-شارالار كەشەنىن جۇرگىزەدى.

«قوعامدىق ءتارتىپتى ساقتاۋعا جانە اۋە، تەمىرجول كولىگىمەن قاتىنايتىن جولاۋشىلاردىڭ قاۋىپسىزدىگىن قامتاماسىز ەتۋ ءۇشىن تاۋلىگىنە دەپارتامەنتتىڭ 1000-نان استام قىزمەتكەرى جۇمىلدىرىلدى. باسشىلىق قۇرام قاتارىنان جاۋاپتى لاۋازىمدى تۇلعالاردىڭ كەزەكشىلىگى بەلگىلەندى»، - دەدى و. بەكەيەۆ.

ۆەدومستۆو باسشىسى ءوز سوزىندە كينولوگتاردىڭ دا قىزمەتتىك-ىزدەستىرۋ يتتەرىن قولدانا وتىرىپ، تۇراقتى تۇردە پەررونداردى، ۆوكزالدار مەن اۋەجايلارداعى بارلىق باگاج بولىمشەلەرىن، ساقتاۋ كامەرالارى مەن كۇتۋ زالدارىن تەكسەرەتىندىگىن جەتكىزدى.