«QazIndustry» قازاقستاندىق يندۋستريا جانە ەكسپورت ورتالىعى وتاندىق ونەركاسىپتىك كاسىپورىندارعا ەڭبەك ونىمدىلىگىن ارتتىرۋ جانە ءونىمدى ىشكى نارىققا ىلگەرىلەتۋ باعىتتارى بويىنشا شىعىندارىنىڭ ءبىر بولىگىن وتەۋ شارالارىن جالعاستىرۋدا، دەپ حابارلايدى aqshamnews.kz.
ق ر ونەركاسىپ جانە قۇرىلىس مينيسترلىگىنىڭ مالىمەتىنشە، اعىمداعى جىلدىڭ سەگىز ايىنىڭ (قاڭتار-تامىز) قورىتىندىسى بويىنشا وتاندىق كاسىپورىندارعا 792،7 ملن تەڭگەگە شىعىندارى وتەلگەن. بۇل تۋرالى بيزنەستى ىنتالاندىرۋ ديرەكسياسى حابارلادى.
وتىنىمدەردى قاراۋدىڭ ناتيجەسىندە ءبىرىنشى باعىت - ەڭبەك ونىمدىلىگىن ارتتىرۋعا باعىتتالعان مەملەكەتتىك ىنتالاندىرۋ شارالارى بويىنشا وتەلگەن قاراجاتتىڭ جالپى سوماسى 772،6 ملن تەڭگەنى قۇرادى. بۇل باعىت بويىنشا وتىنىمدەردىڭ باسىم بولىگى الماتى ق.(74)، الماتى وبلىسىنان (71)، شىمكەنت (67) جانە استانا (55) قالالارىنان كەلىپ ءتۇستى.
ەكىنشى باعىت - وتاندىق وڭدەلگەن تاۋارلاردى، جۇمىستار مەن كورسەتىلەتىن قىزمەتتەردى ىشكى نارىققا ىلگەرىلەتۋگە باعىتتالعان مەملەكەتتىك ىنتالاندىرۋ شارالارى بويىنشا وتەلگەن سوما 20،1 ملن تەڭگەنى قۇرادى. ءوتىنىم بەرۋ بويىنشا كوشباسشى وڭىرلەر باتىس قازاقستان، پاۆلودار جانە قوستاناي وبلىستارى مەن الماتى قالاسى بولدى.
سالالىق بولىنىستە وتىنىمدەردى كوبىنەسە ماشينا جاساۋ، تاماق جانە سۋسىندار ءوندىرىسى، جەڭىل ونەركاسىپ جانە مەتاللۋرگيا سەكتورىنداعى كاسىپورىندار جىبەرگەن.
سونىمەن قاتار، QazIndustry ماماندارى تۇراقتى تۇردە ونەركاسىپ كاسىپورىندارىنا شىعىنداردىڭ ءبىر بولىگىن وتەۋ شارتتارى مەن تەتىكتەرىن ءتۇسىندىرۋ جۇمىستارىن جۇرگىزەدى. QazIndustry وكىلدەرى تەلەفون ارقىلى كونسۋلتاسيالار بەرىپ، اشىق ەسىك كۇندەرىن وتكىزەدى. سونداي-اق، ماماندار كاسىپورىندارعا بارۋ ارقىلى جانە ءتۇرلى بەيىندى فورۋمدار مەن كونفەرەنسيالاردا ءوز قىزمەتتەرىن تانىستىرادى.