مەملەكەتتىك قىزمەتشىلەرگە قويىلاتىن تالاپتار

مەملەكەتتىك قىزمەتشىلەر – قوعام ومىرىندە ماڭىزدى ءرول اتقاراتىن تۇلعالار. ولاردىڭ قىزمەتتىك ءتارتىبى مەن ادەبىنە جوعارى تالاپتار قويىلادى.

قازاقستاندا مەملەكەتتىك قىزمەتشىلەردىڭ قىزمەتتىك ەتيكاسى قازاقستان رەسپۋبليكاسى پرەزيدەنتىنىڭ 2015 جىلعى 29 جەلتوقسانداعى №153 جارلىعىمەن بەكىتىلگەن مەملەكەتتىك قىزمەتشىلەردىڭ ادەپ كودەكسىمەن رەتتەلەدى. بۇل قۇجات قوعامنىڭ مەملەكەتتىك ورگاندارعا دەگەن سەنىمىن نىعايتۋعا، مەملەكەتتىك قىزمەتتە جوعارى مادەنيەت پەن پاراساتتىلىق اتموسفەراسىن قالىپتاستىرۋعا، سونداي-اق ادەپسىز مىنەز-قۇلىقتىڭ الدىن الۋعا باعىتتالعان. كودەكستە بەلگىلەنگەن ادەپ ستاندارتتارى بارلىق مەملەكەتتىك قىزمەتشىلەر ءۇشىن مىندەتتى بولىپ تابىلادى.

مەملەكەتتىك قىزمەتشىلەردىڭ ادەپ قاعيداتتارى:

🔹 ادال نيەتتىلىك – قوعام يگىلىگى ءۇشىن مەملەكەتكە كاسىبي ءارى جاۋاپتى قىزمەت ەتۋ.
🔹 ادالدىق – ءوز مىندەتتەرىنە شىنايى كوزقاراسپەن قاراۋ.
🔹 ادىلدىك – زاڭ تالاپتارىن بۇلجىتپاي ورىنداپ، شەشىم قابىلداۋ كەزىندە وبەكتيۆتى بولۋ.
🔹 اشىقتىق – حالىقپەن كەرى بايلانىس ورناتىپ، قىزمەتىنىڭ اشىقتىعىن قامتاماسىز ەتۋ.
🔹 سىپايىلىق – ازاماتتار مەن ارىپتەستەرگە قۇرمەتپەن قاراۋ.
🔹 كليەنتكە باعدارلانۋ – مەملەكەتتىك قىزمەت كورسەتۋدىڭ ساپاسىن ارتتىرىپ، بيۋروكراتيا مەن ارتىق اۋرە-سارساڭعا جول بەرمەۋ.

سونىمەن قاتار، مەملەكەتتىك قىزمەتشى كاسىبي ءبىلىم مەن ىسكەرلىك قاسيەتتەردى مەڭگەرۋمەن قاتار، قاراپايىم، ادەپتى، ءادىل بولۋى، قىزمەتتىك جاعدايىن جەكە مۇددەسىنە پايدالانباۋى جانە ازاماتتاردىڭ قۇقىقتارىنا نۇقسان كەلتىرەتىن ارەكەتتەرگە قارسى تۇرۋى ءتيىس. سونداي-اق، ول قىزمەتتەن تىس ۋاقىتتا دا مورالدىق-ادەپتىك نورمالاردى ساقتاپ، ارىپتەستەرىمەن ىسكەرلىك قارىم-قاتىناس ورناتۋى قاجەت.

ءاربىر مەملەكەتتىك قىزمەتشى ءوز مىندەتىن ادال ورىنداپ، زاڭدىلىقتى ساقتاۋعا جانە قوعامنىڭ دامۋىنا ۇلەس قوسسا، حالىقتىڭ بيلىككە دەگەن سەنىمى ارتىپ، مەملەكەتتىك قىزمەتتىڭ بەدەلى جوعارىلايتىنى ءسوزسىز.