بىلتىرعى جىلمەن سالىستىرعاندا بيىلعى گرانتتىق كونكۋرسقا 11 000 تالاپكەر ارتىق قاتىستى، دەپ حابارلايدى aqshamnews.kz.
«گرانتتاردى تاعايىنداۋ جونىندەگى شەشىم رەسپۋبليكالىق كونكۋرستىق كوميسسياسىندا قابىلدانىپ، 3 تامىزدا ناتيجەلەرى جاريالاندى. مەملەكەتتىك ءبىلىم بەرۋ تاپسىرىسىنىڭ سوڭعى 3 جىلدا العاش رەت 99%-ى يگەرىلدى. اتاپ ايتساق، كونكۋرس ناتيجەسى بويىنشا الەۋمەتتىك وسال توپتاردان 412 جەتىم بالا، مۇگەدەكتىگى بار 382 ادام، كوپبالالى وتباسىنان شىققان 3 576 بالا، تولىق ەمەس وتباسىدان شىققان 933 بالا، مۇگەدەك بالالاردى تاربيەلەپ وتىرعان وتباسىدان 437 بالاعا گرانت بەرىلدى»، — دەپ باياندادى ۇكىمەت وتىرىسى بارىسىندا عىلىم جانە جوعارى ءبىلىم ءمينيسترى ساياسات نۇربەك.
سونداي-اق ەلىمىزدىڭ باتىس جانە حالىق تىعىز قونىستانعان وڭىرلەرىنىڭ جاستارى ءۇشىن نىسانالى گرانتتاردىڭ 100% يگەرىلگەنى اتاپ ءوتىلدى.
جالپى، 2024-2025 وقۋ جىلىنا باكالاۆر بويىنشا 78 219، ماگيستراتۋرا ءۇشىن 13 113 جانە دوكتورانتۋرا ءۇشىن 2 919 گرانت ءبولىندى. مەملەكەتتىك تاپسىرىستىڭ 60%-دان استامى ەكونوميكانىڭ باسىم سالالارىندا كادرلار دايارلاۋعا باعىتتالعان.