ق ر ونەركاسىپ جانە قۇرىلىس مينيسترلىگى بۇعان دەيىن 26 كەن ورنى بويىنشا ەلەكتروندى اۋكسيون وتكىزۋ تۋرالى حابارلاندىرۋ جاريالاعان.
كەن ورىندارى قۇرامىندا التىن، كۇمىس، قورعاسىن، مىرىش جانە ت.ب قاتتى پايدالى قازبالاردىڭ قورى بار.
اۋكسيونعا قاتىسۋعا وتىنىمدەر 2025 جىلدىڭ 15 قاڭتارىنا دەيىن «minerals.e-qazyna.kz» جەر قويناۋىن پايدالانۋدىڭ ءبىرىڭعاي پلاتفورماسى ارقىلى قابىلدانادى، دەپ حابارلايدى aqshamnews.kz ونەركاسىپ جانە قۇرىلىس مينيسترلىگىنە سىلتەمە جاساپ.
ەلەكتروندىق اۋكسيون 2025 جىلدىڭ 29 قاڭتارىندا e-qazyna.kz مەملەكەتتىك مۇلىك ءتىزىلىمىنىڭ ۆەب-پورتالىندا وتەدى.
جەر قويناۋىن پايدالانۋ سالاسىنداعى اقپاراتتىڭ بولۋى «جەر قويناۋى جانە جەر قويناۋىن پايدالانۋ تۋرالى» ق ر كودەكسىنىڭ 7-بابىمەن رەتتەلەدى، وعان سايكەس مەملەكەت جەر قويناۋىن پايدالانۋ قۇقىعىن بەرۋگە ارنالعان اۋكسيوندار تۋرالى اقپاراتقا، اۋكسيون شارتتارى مەن ناتيجەلەرىنە اشىق قولجەتىمدىلىكتى قامتاماسىز ەتەدى.
ناتيجەسىندە، مينيسترلىكتىڭ رەسمي ينتەرنەت-رەسۋرسىندا اۋكسيونداردان كەيىن ءاربىر سالا بويىنشا اۋكسيون ناتيجەلەرىنىڭ حاتتامالارى تۇراقتى تۇردە جاريالانادى، وندا جەڭىمپاز كومپانيالاردىڭ اتاۋلارى، سونداي-اق قول قويۋ بونۋستارىنىڭ تۇپكىلىكتى سومالارى كورسەتىلەدى.
بۇدان بولەك، ەگەر سيرەك جەر مەتالدارى بار كەن ورىندارى اۋكسيونعا شىعارىلسا، الەۋەتتى ينۆەستورلارعا ءوز وندىرىسىندە مەتاللۋرگيا ونىمدەرىن وڭدەۋ جانە ءوندىرۋ نەمەسە قازاقستاندا زاۋىت سالۋ تۇرىندەگى قوسىمشا مىندەتتەمەلەر ۇسىنىلادى.
بۇل قوسىمشا مىندەتتەمەلەر كەندى ءوندىرۋ جانە شەتەلگە ەكسپورتتاۋ عانا ەمەس، ەلىمىزدە سيرەك كەزدەسەتىن مەتالداردى وڭدەۋدىڭ كەپىلى بولىپ تابىلادى.
ەگەر قول قويۋ بونۋسىنىڭ تۇپكىلىكتى سوماسى اۋكسيون جەڭىمپازىمەن تولەنبەسە، باسىمدىق كەلەسى قاتىسۋشىعا بەرىلەتىنىن اتاپ وتكەن ءجون.
سالىق زاڭناماسىنا سايكەس قول قويۋ بونۋسىنىڭ تۇپكىلىكتى سوماسىن تولەمەۋ جەڭىمپازدى تولەم مىندەتتەمەلەرىنەن بوساتپايدى، سونىمەن قاتار دەپوزيتكە سالىنعان كەپىلدىك ءوز مىندەتتەمەلەرىن ورىنداماعان جەڭىمپازعا قايتارىلمايدى جانە بۇل سومالار مەملەكەتتەن ءوندىرىپ الىنادى.