2024 جىلى 19 ساۋىردە مەملەكەت باسشىسى قاسىم-جومارت توقايەۆ "قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنساۋلىق ساقتاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" قازاقستان رەسپۋبليكاسىنىڭ زاڭىنا قول قويدى، دەپ حابارلايدى almaty-akshamy.kz.
زاڭ مەديسينا قىزمەتكەرلەرىن قۇقىقتىق جانە قارجىلىق تۇرعىدان قورعاۋ جۇيەسىن ەنگىزۋگە جانە ولاردىڭ جاۋاپكەرشىلىگىن ارتتىرۋعا، سونداي-اق جاستار اراسىندا قۇرامىندا نيكوتينى بار زاتتاردىڭ تارالۋىنىڭ الدىن الۋ جانە وعان قارسى كۇرەسۋ ءۇشىن جۇيەلى شارالار قابىلداۋعا باعىتتالعان، دەلىنگەن اقوردا باسپا ءسوز قىزمەتىنىڭ حابارلاماسىندا.
زاڭ ارقىلى مەديسينا قىزمەتكەرلەرىنىڭ كاسىبي جاۋاپكەرشىلىگىن ساقتاندىرۋ تەتىگى ەنگىزىلدى (زاڭ رەسمي جاريالانعاننان كەيىن 6 اي وتكەن سوڭ قولدانىسقا ەنەدى).
سونىمەن قاتار مەديسينا قىزمەتكەرلەرىن قولداۋعا باعىتتالعان تۇزەتۋلەر قابىلداندى. اتاپ ايتقاندا:
تۇرعىلىقتى جەرى بويىنشا مەكتەپكە دەيىنگى ۇيىمداردان بالالارى ءۇشىن باسىم تارتىپپەن ورىن الۋ، كاسىبي قىزمەتىنە زاڭسىز ارالاسۋدان جانە كەدەرگى كەلتىرۋدەن قورعاۋ، ماماندىعىنا قۇرمەتپەن قاراۋ، مەديسينالىق ماماندىعى بويىنشا اسكەري قىزمەتىن وتكەرۋ نەمەسە اسكەري قىزمەتكە شاقىرۋدى كەيىنگە قالدىرۋ قۇقىقتارى بەرىلدى؛
باسى ارتىق ەسەپ نەمەسە اقپارات بەرۋدەن بوساتۋ ءۇشىن دەنساۋلىق ساقتاۋ سالاسىنداعى ۋاكىلەتتى ورگان بۇدان بىلاي مەديسينا قىزمەتكەرلەرى تولتىرۋعا مىندەتتى قۇجاتتاما تىزبەسىن بەكىتەدى؛
اسا تاپشى ماماندىقتى مەڭگەرگەن مەديسينا قىزمەتكەرلەرى اۋىلدىق جەرگە كەمىندە 5 جىل جۇمىس ىستەۋگە كەلگەن جاعدايدا، وعان ەڭ تومەنگى جالاقىنىڭ 100 ەسەلەنگەن مولشەرىندە بىررەتتىك اقشالاي تولەم بەرىلەدى.
بۇدان بولەك، زاڭدا شەگۋگە كەلمەيتىن تەمەكى ونىمدەرىن، ۆەيپتەردى، حوش يىستەندىرگىشتەردى جانە ولارعا ارنالعان سۇيىقتىقتاردى ساتۋعا، تاراتۋعا، سونداي-اق ولاردى جارنامالاۋعا تىيىم سالۋ قاراستىرىلعان (بۇل نورما رەسمي جاريالانعاننان كەيىن 60 كۇن وتكەن سوڭ قولدانىسقا ەنگىزىلەدى).