ۇكىمەتتىڭ كەڭەيتىلگەن وتىرىسىندا مەملەكەت باسشىسى مينيسترلىكتەر جانە باسقا دا قۇزىرلى ورگانداردىڭ جاقىن اراداعى نەگىزگى مىندەتتەرىنە توقتالدى، دەپ حابارلايدى aqshamnews.kz.
"ءبىرىنشى. ەكونوميكانى ءارتاراپتاندىرۋ. بىلتىر وڭدەۋ ونەركاسىبى سالاسىندا 180 ينۆەستيسيالىق جوبا جۇزەگە اسىرىلدى. جوبالاردىڭ جالپى قۇنى – 1،3 تريلليون تەڭگە. سونىڭ ناتيجەسىندە وسى سالاداعى ءوسىم 6 پايىزعا جۋىقتادى. بۇل – سوڭعى ون جىلداعى ەڭ جوعارى كورسەتكىش. وسى جاقسى ءۇردىستى ءبىرجولا ورنىقتىرىپ، ساقتاپ قالۋ كەرەك.
تاعى ءبىر اسا ماڭىزدى ماسەلە – ەكونوميكاعا ينۆەستيسيا تارتۋ. بۇۇ مالىمەتتەرىنە سايكەس، قازاقستان بۇل كورسەتكىش بويىنشا ايتارلىقتاي تابىسقا قول جەتكىزگەن. دەگەنمەن توقمەيىلسۋگە نەگىز جوق.
ينۆەستورلاردىڭ ماسەلەسىن شۇعىل شەشۋ ءۇشىن ينۆەستيسيا شتابى قۇرىلدى. سونىڭ ارقاسىندا بيۋروكراتيالىق كەدەرگىلەر مەن قۇقىقتىق قاراما-قايشىلىقتار جويىلىپ، كەيبىر جوبالاردى تەزىرەك جۇزەگە اسىرۋعا جول اشىلدى. الايدا باستى ماقسات – «جەكەلەگەن» پروبلەمالاردى عانا شەشپەي، ەلدەگى تۇتاس ينۆەستيسيالىق احۋالدى جاقسارتۋ.
ينۆەستيسيالىق جوبالاردى ازىرلەۋ بارىسىندا ۆەدومستۆوارالىق ۇيلەستىرۋگە ءالى دە كوپ ۋاقىت كەتەدى. ۇكىمەت باسى ارتىق بيۋروكراتيادان ارىلىپ، جەدەل جۇمىس ىستەۋى كەرەك.
مەملەكەتتىك قىزمەتشىلەردىڭ قۇلىقسىزدىعى جانە جاۋاپكەرشىلىك الۋدان تايسالۋى كەلىسۋ راسىمدەرى مەن شەشىم قابىلداۋدىڭ تىم ۇزاققا سوزىلۋىنا سەبەپ بولىپ وتىر. مۇنى اشىق ايتقان ابزال"، - دەدى پرەزيدەنت.