مەملەكەت باسشىسى تۇركىستان وبلىسىنىڭ اكىمىن قابىلدادى

ءومىرزاق شوكەيەۆتىڭ ايتۋىنشا، وبلىستا ساۋدا، اۋىل شارۋاشىلىعى، قۇرىلىس، ينۆەستيسيا، شاعىن جانە ورتا بيزنەس سالالارىندا ءوسىم بار.

مەملەكەت باسشىسى تۇركىستان وبلىسىنىڭ اكىمى ءومىرزاق شوكەيەۆتى قابىلدادى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.

قاسىم-جومارت توقايەۆقا تۇركىستان وبلىسىنىڭ الەۋمەتتىك-ەكونوميكالىق دامۋىنىڭ بيىلعى 9 ايداعى قورىتىندىلارى تۋرالى باياندالدى. ءومىرزاق شوكەيەۆتىڭ ايتۋىنشا، وبلىستا ساۋدا، اۋىل شارۋاشىلىعى، قۇرىلىس، ينۆەستيسيا، شاعىن جانە ورتا بيزنەس سالالارىندا ءوسىم بار. ءوڭىر جالپى ءونىمنىڭ كورسەتكىشى بويىنشا رەسپۋبليكادا ەكىنشى ورىنعا شىققان.

مەملەكەت باسشىسىنا وبلىستاعى ەپيدەميولوگيالىق احۋال تۋرالى مالىمەت بەرىلدى. جالپى كوروناۆيرۋس ىندەتى باستالعالى بەرى وڭىردە 14 645 ادام ىندەت جۇقتىرعان. بۇل – وبلىس تۇرعىندارىنىڭ 1،6 پايىزى. ءقازىر ايماقتاعى ازاماتتاردىڭ 97،8 پايىزى ۆاكسينانىڭ ءبىرىنشى كومپونەنتىن العان.

سونداي-اق ءومىرزاق شوكەيەۆ تۇركىستان قالاسىن تازا سۋمەن قامتاماسىز ەتۋ جۇمىستارى بويىنشا ەسەپ بەردى. وبلىس ورتالىعىنىڭ ماڭىنداعى 4 قاينار اۋىز سۋ قورىن ارتىعىمەن قامتاماسىز ەتۋگە مۇمكىندىك بەرگەن. پرەزيدەنتكە قازىرگى ۋاقىتتا وڭىردەگى اعىن سۋ تاپشىلىعى ماسەلەسىن شەشۋگە باعىتتالعان جۇمىستار تۋرالى باياندالدى. قاسىم-جومارت توقايەۆ تۇركىستان وبلىسىندا اتقارىلىپ جاتقان جۇمىستارعا وڭ باعا بەردى. مەملەكەت باسشىسى سۋمەن قامتاماسىز ەتۋ جۇمىستارىن جانە ايماقتاعى وزگە دە قولعا الىنعان جوبالاردى كەزەڭ-كەزەڭىمەن، ۋاقتىلى جۇرگىزىپ، تياناقتى اياقتاۋدى تاپسىردى.