مەملەكەت باسشىسى باۋىرلاس تۇركيا پرەزيدەنتىمەن باكۋ تورىندە كەزدەسىپ وتىرعانىنا قۋانىشتى ەكەنىن جەتكىزىپ، بيىل قازاقستان مەن تۇركيا اراسىنداعى دوستىق جانە ىنتىماقتاستىق تۋرالى كەلىسىمگە 30 جىل تولعانىن اتاپ ءوتتى، دەپ حابارلايدى aqshamnews.kz
– ءقازىر دە باۋىرلاستىق قارىم-قاتىناسىمىز قارقىندى دامىپ جاتىر. ساياسي دەڭگەيدە سىندارلى ديالوگ بار. ۇكىمەتتەرىمىزدىڭ ىقپالداستىعى ارتىپ كەلەدى. تۇركيا – قازاقستاننىڭ ەڭ ءىرى بەس ساۋدا سەرىكتەسىنىڭ ءبىرى. بىلتىر ەكىجاقتى ساۋدا-ساتتىق 6 ميلليارد دوللارعا جەتتى، – دەدى قاسىم-جومارت توقايەۆ.
سونىمەن قاتار پرەزيدەنت تۇركيانىڭ قازاقستان ەكونوميكاسىنا مول قارجى قۇيعان نەگىزگى ينۆەستورلاردىڭ قاتارىندا ەكەنىنە نازار اۋدارىپ، تۇرىك بيزنەسمەندەرىنىڭ قاتىسۋىمەن جۇزەگە اسىرىلىپ جاتقان ينۆەستيسيالىق جوبالار جەكە باقىلاۋىندا بولاتىنىن مالىمدەدى. رەجەپ تاييپ ەردوعان قازاقستان مەن تۇركيا اراسىنداعى قارىم-قاتىناس ستراتەگيالىق سيپاتتا دامىپ كەلە جاتقانىن اتاپ ءوتىپ، ەكى ەلدىڭ ساۋدا-ەكونوميكالىق ىنتىماقتاستىعىن ودان ءارى جانداندىرۋ ءۇشىن مول الەۋەت بار ەكەنىن ايتتى.
– ءقادىرلى باۋىرىم، كەلەسى جىلى انكارادا وتەتىن جوعارى دەڭگەيدەگى ستراتەگيالىق ىنتىماقتاستىق كەڭەسىنىڭ 5ء-شى وتىرىسى بارىسىندا اۋىل شارۋاشىلىعى، قورعانىس، ەنەرگەتيكا، كولىك-لوگيستيكا، سونداي-اق مادەني-گۋمانيتارلىق سالالاردا ماڭىزدى كەلىسىمدەرگە قول جەتكىزەتىنىمىزگە سەنىمدىمىن. ءبىز قازاقستانمەن اراداعى ساۋدا اينالىمىن 15 ميلليارد دوللارعا دەيىن ارتتىرۋعا ۇمتىلامىز، – دەدى تۇركيا پرەزيدەنتى.
بۇل رەتتە رەجەپ تاييپ ەردوعان تۇرىك كومپانيالارى قازاقستان ەكونوميكاسىنىڭ ءارتۇرلى سەكتورىندا تابىستى جۇمىس ىستەپ جاتقانىنا توقتالدى. ونىڭ ايتۋىنشا، تۇرىك بيزنەسمەندەرى قازاقستانداعى اۋىل شارۋاشىلىعى سالاسىنىڭ الەۋەتىن يگەرۋ، اەس سالۋ جانە مۇناي-گاز تاسىمالى باعىتىندا تاجىريبە ءبولىسىپ، ءوزارا ءتيىمدى سەرىكتەستىك قۇرۋعا دايىن.
بۇدان بولەك مەملەكەتتەر باسشىلارى حالىقارالىق جانە ايماقتىق كۇن تارتىبىندەگى وزەكتى ماسەلەلەر جونىندە پىكىر الماسىپ، كوپجاقتى قۇرىلىمدار اياسىندا بىر-بىرىنە قولداۋ كورسەتۋ جونىندە ۋاعدالاستى.