توقايەۆ بەكتەنوۆكە ءبىرقاتار تاپسىرما بەردى.
قاسىم-جومارت توقايەۆقا ەلىمىزدە سىبايلاس جەمقورلىققا قارسى كۇرەس بويىنشا قابىلدانىپ جاتقان شارالار جونىندە باياندالدى. اتاپ ايتقاندا، التى ايدا 1 200 سىبايلاس جەمقورلىققا قاتىستى ءىس قوزعالىپ، 750 لاۋازىمدى تۇلعانىڭ قىلمىسى اشكەرەلەندى، دەپ حابارلايدى Almaty-akshamy.kz اقورداعا سىلتەمە جاساپ.
پرەزيدەنتكە قىلمىستىق ىستەردى تەرگەۋ بارىسى جانە كەلتىرىلگەن شىعىندى وتەۋ شارالارى جونىندە اقپارات بەرىلدى. سونىڭ ىشىندە ەلدەن زاڭسىز جىلىستاتىلعان قارجى اكتيۆتەرىن قايتارۋ تۋرالى دا ايتىلدى.
ولجاس بەكتەنوۆتىڭ حابارلاۋىنشا، اتالعان شارالار اياسىندا حالىقارالىق ىنتىماقتاستىقتى كەڭەيتۋ جۇمىستارى جالعاسۋدا. قازاقستاننىڭ ەۋروپا كەڭەسىنىڭ سىبايلاس جەمقورلىق ءۇشىن قىلمىستىق جاۋاپكەرشىلىك جونىندەگى كونۆەنسياسىنا قوسىلۋى، جەمقورلاردىڭ كولەڭكەلى تابىستارىن اشۋ ىسىندەگى ءتيىمدى ادىستەردىڭ ءبىرى بولماق.
بۇدان بولەك، پرەزيدەنتتىڭ تاپسىرماسىنا سايكەس اگەنتتىك «اتامەكەن» ۇلتتىق كاسىپكەرلەر پالاتاسىمەن بىرلەسىپ، شەنەۋنىكتەردىڭ بيزنەسكە زاڭسىز ارالاسۋىن بولدىرماۋ جونىندەگى قورعاۋ تەتىكتەرى بويىنشا شارالار كەشەنىن ازىرلەدى.
كەزدەسۋ قورىتىندىسى بويىنشا مەملەكەت باسشىسى سىبايلاس جەمقورلىققا قارسى قىزمەتتىڭ جۇمىسىن كۇشەيتۋگە قاتىستى ءبىرقاتار تاپسىرما بەردى.