ۇكىمەت پەن ەسەپ كوميتەتى ءاربىر تەڭگەنىڭ كوزدەلگەن ماقساتقا جۇمسالۋىن قامتاماسىز ەتۋى قاجەت
مەملەكەت باسشىسى قاسىم-جومارت توقايەۆتىڭ توراعالىعىمەن رەفورمالار جونىندەگى جوعارى كەڭەستىڭ كەزەكتى وتىرىسى ءوتتى، دەپ حابارلايدى Almaty-akshamy.kz اقوردانىڭ سايتىنا سىلتەمە جاساپ.
جيىن ۇلتتىق جوبالاردى ازىرلەۋگە قاتىستى ماسەلەلەردى تالقىلاۋدان باستالدى. «جايلى مەكتەپ» جوباسى بويىنشا وقۋ-اعارتۋ ءمينيسترى اسحات ايماعامبەتوۆ بايانداما جاسادى.
ءمينيستردىڭ ايتۋىنشا، جوبانىڭ ماقساتى – مەكتەپتەردەگى ورىن تاپشىلىعى ماسەلەسىن جۇيەلى تۇردە شەشۋ. جوبانىڭ جۇزەگە اسىرىلۋى 800 مىڭ وقۋشىعا ارنالعان جاڭا فورماتتاعى مەكتەپتەر سالۋعا مۇمكىندىك بەرەدى. جاڭا قولايلى مەكتەپتەردىڭ قازىرگى سالىنىپ جاتقان مەكتەپتەردەن كونسەپتۋالدى ارتىقشىلىعى مىنادا: قۇرىلىستىڭ ءبىرىڭعاي ستاندارتى ساقتالادى، ءپان كابينەتتەرى مەن زەرتحانالار تولىقتاي جابدىقتالادى، 1-4 سىنىپ جانە 5-11 سىنىپ وقۋشىلارى ءۇشىن دەربەس بلوك بولادى، سپورت زالدارىنىڭ سانى وقۋشى سانىنا قاراي ەسەپتەلەدى جانە 1-4 سىنىپ پەن 5-11 سىنىپ وقۋشىلارى ءۇشىن بولەك ورنالاستىرىلادى، ءار مەكتەپتە قىزدار مەن ۇلداردى ەڭبەككە باۋلۋعا ارنالعان امبەباپ شەبەرحانالار مەن ستۋديالار قاراستىرىلادى. وسى جانە وزگە دە جاڭاشىلدىقتار بالالارىمىزدىڭ داعدىلارى مەن قابىلەتتەرىن جان-جاقتى دامىتۋعا باعىتتالعان.
باياندامانى تىڭداعان پرەزيدەنت ءبىلىم الۋ ءۇشىن دۇرىس جاعداي جاساۋ مەملەكەتتىڭ اسا ماڭىزدى مىندەتى ەكەنىن اتاپ ءوتتى.
«وكىنىشكە قاراي، بۇگىنگە دەيىن كوپ تالقىلانعانىنا قاراماستان، ءۇش اۋىسىمدى، اپاتتى، ەسكى مەكتەپتەر ماسەلەسى شەشىلگەن جوق. سوندىقتان وسى ۇلتتىق جوبانىڭ جۇزەگە اسىرىلۋى ۇكىمەتتىڭ دە، جەرگىلىكتى اتقارۋشى ورگانداردىڭ دا ەرەكشە باقىلاۋىندا بولۋعا ءتيىس. ۇكىمەت پەن ەسەپ كوميتەتى ءاربىر تەڭگەنىڭ كوزدەلگەن ماقساتقا جۇمسالۋىن قامتاماسىز ەتۋى قاجەت. اكىمدەر جىل سوڭىنا دەيىن جەر، ينفراقۇرىلىم جونىندەگى بارلىق ماسەلەنى شەشۋى كەرەك. مۇندا ەش اقتالۋدىڭ رەتى جوق. سوندىقتان ءوڭىر باسشىلارىنىڭ جەكە جاۋاپكەرشىلىگىن كۇشەيتۋ جونىندەگى ۇسىنىستى قولدايمىن. قۇرىلىسى 2023 جىلى باستالۋعا ءتيىس مەكتەپتەر ءۇشىن جەر ۋچاسكەلەرىن ءبولۋ جانە ينفراقۇرىلىمعا قوسۋ جونىندەگى بارلىق ماسەلە ءبىر اي ىشىندە شەشىلۋى كەرەك. قالعاندارى جىل سوڭىنا دەيىن. ۇكىمەتكە ءاربىر ءوڭىردىڭ وسىنداي مىندەتتەمەلەرىن ايقىنداپ، ولاردىڭ ورىندالۋىن باقىلاۋدى تاپسىرامىن»، – دەدى مەملەكەت باسشىسى.
پرەزيدەنت ۇلتتىق جوبانى كەلەسى جىلدان باستاپ جۇزەگە اسىرۋ ءۇشىن بيىل بارلىق قاجەتتى نورماتيۆتىك اكتىلەردى قابىلداۋدى تاپسىردى. سونىمەن قاتار قاسىم-جومارت توقايەۆ ۇكىمەتتىڭ Samruk-Kazyna Construction-دى ءبىرىڭعاي تاپسىرىس بەرۋشى رەتىندە ايقىنداۋ تۋرالى ۇسىنىسىن قولدادى. وسى رەتتە پرەزيدەنت بيۋدجەتتەن بولىنگەن قارجىنىڭ جۇمسالۋىن قاتاڭ باقىلاۋعا الۋ قاجەت ەكەنىن ايتتى.
مەملەكەت باسشىسى بالالاردىڭ وقۋلىققا تولى ۇلكەن ءارى اۋىر ريۋكزاكتاردى ارقالاپ جۇرۋگە ءماجبۇر بولۋىنا بايلانىستى اتا-انالاردىڭ شاعىمدارىنا ارنايى توقتالدى. بۇل بالالاردىڭ دەنساۋلىعىنا زيان كەلتىرەتىنى انىق.
اسحات ايماعامبەتوۆ پروبلەمالاردى شەشۋگە باعىتتالعان شارالار تۋرالى باياندادى. ونىڭ ايتۋىنشا، سيفرلىق وقۋلىققا كەزەڭ-كەزەڭىمەن كوشۋ ءىسى جۇزەگە اسىرىلىپ جاتىر، سونداي-اق جاڭا مەكتەپتەر وقۋشىلاردىڭ جەكە زاتتارىن، اۋىستىراتىن اياق كيىمدەرى مەن وقۋلىقتارىن ساقتايتىن جەكە شكافتارمەن جابدىقتالادى.
«اۋىلدىق جەردەگى دەنساۋلىق ساقتاۋ سالاسىن جاڭعىرتۋ» اتتى ەكىنشى جوبانى دەنساۋلىق ساقتاۋ ءمينيسترى اجار عينيات تانىستىردى. ونىڭ ايتۋىنشا، جوبا بارلىق اۋىلدىق ەلدى مەكەندەردى مەديسينالىق ينفراقۇرىلىممەن قامتاماسىز ەتۋگە جانە زاماناۋي كوپبەيىندى ورتالىق اۋدانارالىق اۋرۋحانالار جەلىسىن ۇيىمداستىرۋعا باعىتتالعان. اكىمدىكتەرمەن بىرلەسىپ 655 نىساننىڭ، ونىڭ ىشىندە 253 مەدپۋنكت، 160 دارىگەرلىك امبۋلاتوريا جانە 242 فەلدشەرلىك-اكۋشەرلىك پۋنكتتىڭ قۇرىلىسى بويىنشا دايىندىق جۇمىستارى باستالدى. جوبانى ىسكە اسىرۋ مەديسينالىق كومەكتىڭ قولجەتىمدىلىگىن ارتتىرۋعا، اۋىل حالقىنا جەدەل مەديسينالىق كومەك كورسەتۋدى قامتاماسىز ەتۋگە، قان اينالىمى جۇيەسى اۋرۋلارى سالدارىنان ءولىم-جىتىمدى 20 پايىزعا تومەندەتۋگە، ءومىر ءسۇرۋ ۇزاقتىعىن ارتتىرۋعا مۇمكىندىك بەرەدى.
پرەزيدەنت اۋىل حالقىنىڭ 100 پايىزىن ساپالى العاشقى مەديسينالىق كومەكپەن قامتاماسىز ەتۋدى كوزدەيتىن جوبانىڭ الەۋمەتتىك ماڭىزى زور ەكەنىن اتاپ ءوتتى.
«بۇل – مەملەكەت رەتىندە ءبىزدىڭ مىندەتىمىز. الايدا بۇل اتقارىلاتىن بارلىق جۇمىستىڭ ەڭ از بولىگى. سوندىقتان جوبانىڭ ەكىنشى كومپونەنتى – اۋىر دەرتكە شالدىققاندارعا جانە جاراقات العاندارعا ساپالى كومەك كورسەتۋ ۋاقىتىن قىسقارتۋعا مۇمكىندىك بەرەتىن كوپبەيىندى اۋرۋحانالاردىڭ قۇرىلىسىنا قاتىستى ماسەلە دە ماڭىزدى. «التىن ساعات» قاعيداسىن بەكەر ۇستانبايدى – ناۋقاستى جابدىقتالعان اۋرۋحاناعا نەعۇرلىم تەز جەتكىزسە، ونىڭ ءومىرىن ساقتاپ قالۋعا سوعىرلىم مۇمكىندىك مول. بۇل باستاما قاناينالىم جۇيەسىنىڭ اۋرۋى سالدارىنان ادام شىعىنىن ازايتۋعا ايرىقشا ءتيىمدى اسەر ەتەدى دەپ ۇمىتتەنەمىز. ەلىمىزدەگى ازاماتتاردىڭ 35 پايىزى وسى اۋرۋدان كوز جۇمادى. قازاقستاندا ەىدۇ ەلدەرىمەن سالىستىرعاندا، ينسۋلت پەن ينفاركتتان 2 ەسە كوپ قايتىس بولادى. ءتىپتى، جاستارىمىز دا كوز جۇمىپ جاتىر. سوڭعى ۇلگىدەگى تەحنيكامەن جابدىقتالعان كوپبەيىندى اۋرۋحانالار جەلىسى – بۇل ۇلت ساۋلىعىنا قوسىلعان زور ۇلەس ءارى ءتيىمدى شەشىم»، – دەدى قاسىم-جومارت توقايەۆ.
مەملەكەت باسشىسى ونكولوگيالىق اۋرۋلاردىڭ الدىن الۋ جانە ەمدەۋ ماسەلەلەرىن ەرەكشە باقىلاۋعا الۋدى تاپسىردى.
پرەزيدەنت ۇلتتىق جوبالاردىڭ ناقتى ناتيجەلەرىنە قول جەتكىزۋدىڭ ماڭىزدىلىعىن ەرەكشە اتاپ ءوتىپ، ولاردىڭ ىسكە اسىرىلۋىنا مونيتورينگ جۇيەسىن قامتاماسىز ەتۋدى تاپسىردى.
سونداي-اق وتىرىستا قازاقستان رەسپۋبليكاسىنىڭ 2060 جىلعا دەيىن كومىرتەگى بەيتاراپتىعىنا قول جەتكىزۋ تۋرالى ماسەلە قاراستىرىلدى.