بۇگىن – مۇسىلمان قاۋىمنىڭ ۇلىق مەيرامى – قۇربان ايت.
قاسىم-جومارت توقايەۆ قازاقستان حالقىن قۇربان ايت مەرەكەسىمەن قۇتتىقتادى، دەپ حابارلايدى Almaty-akshamy.kz اقورداعا سىلتەمە جاساپ.
ءقادىرلى وتانداستار!
قۇربان ايت قۇتتى بولسىن! بۇل – يماندىلىق پەن مەيىرىمدىلىكتىڭ، ادامگەرشىلىك پەن ادالدىقتىڭ، جاناشىرلىق پەن جاۋاپكەرشىلىكتىڭ ءمان-ماڭىزىن ارتتىرا تۇسەتىن مەيرام.
بارشا مۇسىلماندار اسىعا كۇتەتىن قاستەرلى مەرەكەنىڭ تاعىلىمى زور. قۇربان ايتتا، ەڭ الدىمەن، ساۋابى مول يگى امالدار جاسالىپ، ەلدى ىزگىلىككە باستايتىن قۇندىلىقتار كەڭىنەن دارىپتەلەدى. سول ارقىلى حالقىمىزدىڭ رۋحاني تۇتاستىعى نىعايا تۇسەدى.
اتا ءدىنىمىزدىڭ ۇلاعاتى ءبىزدىڭ سالت-داستۇرىمىزبەن تىعىز ساباقتاسىپ جاتىر. حالقىمىز قاشاندا قيىندىققا تاپ بولعان جاندارعا قول ۇشىن بەرىپ، كومەگىن اياماعان. كوكتەمدەگى الاپات تاسقىن كەزىندە جۇرتىمىزدىڭ وسى اسىل قاسيەتى ايقىن كورىندى. ءبىز ىرىستى ىنتىماعىمىزدىڭ ارقاسىندا كەز كەلگەن قيىندىقتى جەڭەمىز.
ايتتان ايتقا امان-ەسەن جەتە بەرەيىك!
دۇعا-تىلەكتەرىڭىز قابىل بولسىن!
ءار شاڭىراققا اماندىق، تولايىم تابىس تىلەيمىن!