مەملەكەت باسشىسى - قارۋلى كۇشتەردىڭ جوعارعى باس قولباسشىسىنا قازاقستان ارمياسىن رەفورمالاۋ ءۇشىن جۇرگىزىلىپ جاتقان جۇمىستار تۋرالى ەسەپ بەرىلدى
رۋسلان جاقسىلىقوۆ پرەزيدەنتكە «ءقاۋىپسىز ەل» ۇلتتىق جوباسىنىڭ جۇزەگە اسىرىلۋ بارىسى تۋرالى، سونداي-اق مەملەكەت باسشىسىنىڭ قارۋلى كۇشتەر قۇرىلىمى مەن قۇرامىن جاڭعىرتۋ جانە اسكەري دايىندىقتى جەتىلدىرۋ، سيفرلاندىرۋ ءىسىن ودان ءارى جالعاستىرۋ، اسكەري ينفراقۇرىلىمدى دامىتۋ، اسكەري قىزمەتتىڭ بەدەلى مەن تارتىمدىلىعىن ارتتىرۋ جونىندە بەرگەن تاپسىرمالارىنىڭ ورىندالۋى جونىندە باياندادى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
قاسىم-جومارت توقايەۆقا مەملەكەتتىڭ اسكەري قاۋىپسىزدىگىن قامتاماسىز ەتۋ جونىندەگى، ونىڭ ىشىندە ارنايى وپەراسيالار كۇشتەرىن قالىپتاستىرۋ اياسىنداعى مىندەتتەردى شەشۋدىڭ تيىمدىلىگىن ارتتىرۋعا باعىتتالعان ءىس-شارالار جونىندە اقپارات بەرىلدى.
بۇدان بولەك جوعارعى باس قولباسشىعا جەكە قۇرامنىڭ جابدىقتالۋىنا قاتىستى قازىرگى احۋال، قارۋ-جاراق پەن اسكەري تەحنيكانىڭ جاعدايى، ماتەريالدىق-تەحنيكالىق قۇرالداردىڭ قولدا بار قورى جونىندە باياندالدى. مەملەكەت باسشىسىنىڭ تاپسىرماسىن ىسكە اسىرۋ اياسىندا اسكەري ۆەدومستۆو وتاندىق قورعانىس-ونەركاسىپ كەشەنىمەن ءوزارا ىقپالداسا وتىرىپ، اسكەردى تەحنيكالىق تۇرعىدان قايتا جاراقتاۋ شارالارىن قابىلداپ جاتىر.
كەزدەسۋ سوڭىندا پرەزيدەنت قارۋلى كۇشتەردىڭ كەشەندى ءارى جۇيەلى دامۋىن قامتاماسىز ەتۋگە جانە ولاردىڭ قاجەتتى دەڭگەيدەگى اسكەري دايىندىعىنا قولداۋ كورسەتۋگە، سونداي-اق ەلىمىزدىڭ قورعانىس قابىلەتىن ودان ءارى ارتتىرۋعا باعىتتالعان ءبىرقاتار تاپسىرما بەردى.