كەزدەسۋ بارىسىندا پرەزيدەنت انا مەن بالا دەنساۋلىعىن ساقتاۋ سالاسى مەملەكەتىمىزدىڭ باستى باسىمدىعى سانالاتىنىن اتاپ ءوتتى.
قاسىم-جومارت توقايەۆ وتاندىق دەنساۋلىق ساقتاۋ جۇيەسىنىڭ الدىندا جۇكتى ايەلدەر مەن بالالارعا مەديسينالىق كومەكتىڭ قولجەتىمدىلىگىن ءارى ساپاسىن ارتتىرۋ، انا مەن بالا ءولىمىن ازايتۋ، بالالاردىڭ مۇگەدەكتىگىن ەرتە انىقتاۋ جانە الدىن الۋ جونىندە ماڭىزدى مىندەتتەر تۇرعانىن ايتتى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
مەملەكەت باسشىسى پەرزەنتحانالاردىڭ ينفراقۇرىلىمىن نىعايتۋ جانە ولاردىڭ جۇمىسىنا وزىق ستاندارتتار مەن ادىستەمەلەردى ەنگىزۋ قاجەتتىگىنە ەرەكشە نازار اۋداردى.
گۇلنار نۇرلانوۆا پەريناتولوگيا جانە بالالار كارديوحيرۋرگياسى ورتالىعىنىڭ قىزمەتى مەن جەتىستىكتەرى جانە جۇزەگە اسىرىلىپ جاتقان جوبالارى تۋرالى مالىمەت بەردى. سونداي-اق ورتالىق ەلىمىزدەگى تۋا بىتكەن جۇرەك اۋرۋلارى بار ناۋقاستاردى باقىلاۋدىڭ تولىق سيكلى جۇرگىزىلەتىن جالعىز مەكەمە ەكەنىن جەتكىزدى. مۇندا جىل سايىن 200 كارديوحيرۋرگيالىق وتا جاسالادى. پەرزەنتحانادا دۇنيەگە كەلەتىن نارەستەلەر سانى 9000-عا، ونىڭ ىشىندە مەرزىمىنەن بۇرىن تۋعاندار شامامەن 3700-گە جەتەدى.
سونىمەن قاتار پرەزيدەنتكە فەتالدى حيرۋرگياعا قاتىستى ريەۆوليۋسيالىق جوبا ەنگىزىلە باستاعانى جونىندە باياندالدى. مەديسينالىق كومەكتىڭ اتالعان باعىتىنا سايكەس، تۋا بىتكەن دامۋ كەمىستىكتەرىن كوررەكسيالاۋ ءۇشىن بالاعا قۇرساق ىشىندە جاتقاندا وپەراسيا جاسالادى. جوبا دەنى ساۋ بالانى دۇنيەگە اكەلىپ، انا باقىتىنا بولەنۋگە مۇمكىندىك بەرەدى.
قاسىم-جومارت توقايەۆ دارىگەرلەردى قولداۋ ماسەلەلەرىنە ارنايى توقتالىپ، ولاردىڭ قوعام ءۇشىن ءسىڭىرىپ جاتقان ەڭبەگى ماڭىزدى ەكەنىن اتاپ ءوتتى. پرەزيدەنت بيىل مەديسينا قىزمەتكەرلەرىنىڭ مۇددەسىن قورعاۋعا جانە دارىگەر قىزمەتىنىڭ مارتەبەسىن ارتتىرۋعا باعىتتالعان زاڭعا قول قويعانىن ەسكە سالدى. سونىمەن قاتار العاش رەت «قازاقستاننىڭ ەڭبەك سىڭىرگەن دارىگەرى» مەملەكەتتىك ناگراداسى بەكىتىلدى.
كەزدەسۋ سوڭىندا قاسىم-جومارت توقايەۆ گۇلنار نۇرلانوۆاعا جانە بارلىق دارىگەرلەردىڭ يگىلىكتى جۇمىسىنا تابىس تىلەدى.