مەملەكەت باسشىسى بۇۇ-نىڭ 8ء-شى باس حاتشىسى، بواو ازيا فورۋمىنىڭ ءتوراعاسى، جاھاندىق جاسىل دامۋ ينستيتۋتى (GGGI) اسسامبلەياسىنىڭ پرەزيدەنتى پان گي مۋنمەن كەزدەسۋ وتكىزدى، دەپ حابارلايدى اlmaty-akshamy.kz.
قازاقستان پرەزيدەنتى بواو فورۋمىنا قاتىسۋعا شاقىرعانى ءۇشىن پان گي مۋنعا ريزاشىلىعىن ءبىلدىرىپ، ونىڭ بۇۇ باس حاتشىسى قىزمەتىن اتقارعان كەزدە الەمدىك قاۋىمداستىققا ەلەۋلى ەڭبەك سىڭىرگەنىن اتاپ ءوتتى.
– مەنىڭ پىكىرىمشە، ءسىز بىرىككەن ۇلتتار ۇيىمى تاريحىنداعى ەڭ ۇزدىك باس حاتشىلاردىڭ ءبىرى رەتىندە قىزمەت ەتتىڭىز. ەكى جارىم جىل ءسىزدىڭ جەتەكشىلىگىڭىزبەن جۇمىس ىستەۋ مەن ءۇشىن كەرەمەت كەزەڭ ءارى زور مارتەبە بولدى، – دەدى پرەزيدەنت.
پان گي مۋن قاسىم-جومارت توقايەۆتىڭ حالىقارالىق ىنتىماقتاستىقتى دامىتۋعا ەلەۋلى ۇلەس قوسقانىن ايتتى.
– ءسىز قازاقستان پرەزيدەنتى رەتىندە وڭىردەگى بەيبىتشىلىك پەن كەلىسىمدى ساقتاۋعا، ادامزات پەن بۇۇ-نىڭ مۇمكىندىكتەرىن كەڭەيتۋگە بەلسەندى اتسالىسىپ كەلەسىز. مەنىڭ ويىمشا، قازاقستان شىعىس پەن باتىس اراسىنداعى اسا ماڭىزدى كوپىر ءرولىن اتقارىپ وتىر. ءسىز شىعىس پەن باتىستىڭ احۋالىن جاقسى تۇسىنەسىز. بۇل رەتتە تاجىريبەڭىز مول، – دەدى كورەيا ديپلوماتى.
كەزدەسۋدە حالىقارالىق كۇن تارتىبىندەگى وزەكتى ماسەلەلەر، ونىڭ ىشىندە بۇۇ-نىڭ جاھاندىق سىن-قاتەرلەردى ءتيىمدى ەڭسەرۋدەگى ءرولى تالقىلاندى.
مەملەكەت باسشىسى قازاقستاننىڭ حالىقارالىق باستامالارىنا دا توقتالدى. باس اسسامبلەيانىڭ 79-شى سەسسياسى اياسىندا قازاقستان فرانسيامەن بىرلەسىپ، One Water ءسامميتىن وتكىزۋدى جوسپارلاپ وتىر. سونىمەن قاتار استانادا 2026 جىلى وڭىرلىك كليماتتىق سامميت ۇيىمداستىرىلادى.
قاسىم-جومارت توقايەۆ پان گي مۋندى الداعى استانا حالىقارالىق فورۋمىنا باس سپيكەرلەردىڭ ءبىرى رەتىندە قاتىسۋعا شاقىردى.