رەسمي ساپار.
قازاقستان پرەزيدەنتى قاسىم-جومارت توقايەۆ پرەزيدەنت مۋن چجە ءيننىڭ شاقىرۋىمەن كورەيا رەسپۋبليكاسىنىڭ استاناسى سەۋل قالاسىنا مەملەكەتتىك ساپارمەن باردى، دەپ حابارلايدى Almaty-akshamy.kz.
بۇل جونىندە پرەزيدەنتتىڭ باسپا ءسوز حاتشىسى بەرىك ءۋالي حابارلادى.
پرەزيدەنتىمىز قاسىم-جومارت توقايەۆ – پاندەميا باستالعالى بەرى وڭتۇستىك كورەياعا ساپارمەن كەلگەن الەمدىك دەڭگەيدەگى ءبىرىنشى كوشباسشى. مەملەكەتتىك ساپار باعدارلاماسى اسا اۋقىمدى. ەرتەڭ، 17 تامىز كۇنى، پرەزيدەنت مۋن چجە ينمەن كەلىسسوز وتكىزۋ جوسپارلانعان. وندا تاراپتار قازاقستان مەن كورەيا اراسىنداعى ستراتەگيالىق ىنتىماقتاستىقتى ودان ءارى دامىتۋدىڭ كەڭ اۋقىمدى ماسەلەلەرىن قاراستىرادى. كەلىسسوز قورىتىندىسى بويىنشا ءبىرقاتار ەكىجاقتى قۇجاتتارعا قول قويىلادى. قاسىم-جومارت توقايەۆ مۋن چجە ينمەن بىرگە كورەيا بيزنەسىنىڭ جەتەكشىلەرىمەن كەزدەسۋ وتكىزەدى.
سونىمەن قاتار، مەملەكەت باسشىسى كورەيانىڭ ۇلتتىق باتىرى، ءومىرىنىڭ سوڭعى جىلدارىندا قازاقستاندا تۇرعان گەنەرال حون بوم دونى ەسكە الۋعا ارنالعان ءىس-شاراعا قاتىسىپ، وتان ءۇشىن قۇربان بولعانداردىڭ مونۋمەنتىنە گۇل شوعىن قويادى.
بۇدان كەيىن كورەيانىڭ ءىرى كومپانيالارىنىڭ قاتىسۋىمەن ءبىرقاتار ەكىجاقتى كەزدەسۋلەر وتكىزەدى. سونداي-اق بۇۇ-نىڭ بۇرىنعى باس حاتشىسى پان گي مۋنمەن جۇزدەسۋ جوسپارلانعان، دەپ جازدى ول فەيسبۋك پاراقشاسىدا.