ماڭعىستاۋ وبلىستىق ءبىلىم بەرۋ، دەنساۋلىق ساقتاۋ سالاسىن دامىتىپ، جاستارعا قولداۋ كورسەتۋ كەرەك.
بۇل تۋرالى پرەزيدەنت قاسىم-جومارت توقايەۆ ءوڭىر جۇرتشىلىعىمەن كەزدەسۋدە ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قازىرگى زاماندا ءار ازاماتتىڭ جانە تۇتاس ەلدىڭ تابىستى بولۋىنا ءىلىم مەن ءبىلىم مول مۇمكىندىك بەرەدى. سوندىقتان، ءبىلىم ينفراقۇرىلىمىن دامىتۋ جانە ونىڭ ساپاسىن ارتتىرۋ ەلىمىز ءۇشىن باستى باسىمدىق بولىپ وتىر.
ەڭ الدىمەن، مەكتەپكە دەيىنگى تاربيە جانە وقىتۋ ءىسىنىڭ قولجەتىمدى بولۋىنا نازار اۋدارۋ قاجەت. ماڭعىستاۋ وبلىسىندا بالاباقشا ماسەلەسى تولىق شەشىمىن تاپپاعان. مۇندا 10 مىڭعا جۋىق بالاعا ورىن جەتىسپەيدى. بۇل ماسەلەنى شەشۋ ءۇشىن مەملەكەت پەن جەكەمەنشىكتىڭ سەرىكتەستىگىن تولىق پايدالانۋ كەرەك.
بيىل وڭىردە 17 جەكەمەنشىك بالاباقشا اشىلدى. بۇل جۇمىستى جالعاستىرۋ قاجەت»، - دەدى مەملەكەت باسشىسى.
ول ايماقتاعى ورتا ءبىلىم بەرۋ سالاسىنداعى جاعدايدىڭ دا ءماز ەمەستىگىن دە جەتكىزدى. وبلىستاعى 13 مىڭ وقۋشىعا مەكتەپتەن ورىن جەتپەي جاتىر. اپاتتى جاعدايدا تۇرعان، ءۇش اۋىسىممەن وقىتاتىن مەكتەپتەر بار. «جايلى مەكتەپ» ۇلتتىق جوباسى بويىنشا ماڭعىستاۋ ايماعىندا الداعى ءۇش جىلدىڭ ىشىندە 21 مەكتەپ سالىنادى.
«ءبىراق، بۇل دا جەتكىلىكسىز. وبلىس اكىمدىگى ءۇش جىلدىڭ ىشىندە ءۇش اۋىسىممەن وقىتاتىن مەكتەپتەردىڭ ماسەلەسىن تولىق شەشۋگە ءتيىس. بۇل جۇمىستا بيزنەستىڭ مۇمكىندىگىن كەڭىنەن پايدالانعان ءجون. قاجەتتى تاجىريبە بار. سوڭعى ەكى جىلدا ايماقتا 19 جەكەمەنشىك مەكتەپ اشىلعان. وبلىستا قالا مەن اۋىل، اقتاۋ مەن جاڭاوزەن مەكتەپتەرى اراسىندا ءبىلىم ساپاسى بويىنشا وراسان زور الشاقتىق بار. بۇعان جول بەرۋگە بولمايدى.
ءبىلىم دەڭگەيى ءار بالانىڭ تۇلعا بولىپ قالىپتاسۋىنا اسەر ەتەدى. ال، ءبىز بارلىق وقۋشىعا بىردەي ساپالى ءبىلىم بەرۋىمىز كەرەك. بۇل – مەملەكەتتىڭ مىندەتى. مەن بۇعان باسا ءمان بەرەمىن»، - دەدى مەملەكەت باسشىسى.