ەكى ەل اراسىنداعى كولىك-ترانزيت ءدالىزى تابىستى دامىپ كەلەدى
قاسىم-جومارت توقايەۆ سامارقاند قالاسىندا ءوتىپ جاتقان شانحاي ىنتىماقتاستىق ۇيىمىنىڭ ءسامميتى اياسىندا يران يسلام رەسپۋبليكاسىنىڭ پرەزيدەنتى يبراحيم رايسيمەن كەزدەستى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
كەزدەسۋدە قازاقستان پرەزيدەنتى بيىل ماۋسىم ايىندا ءوزىنىڭ تەگەرانعا جاساعان ساپارىن ىقىلاسپەن ەسكە الىپ، قول جەتكىزگەن ۋاعدالاستىقتاردى جۇزەگە اسىرۋ ءۇشىن ۇكىمەتكە ءتيىستى تاپسىرمالار بەرىلگەنىن اتاپ ءوتتى.
قازاقستان تاراپى قىسقا مەرزىمدە يرانعا جەتكىزىلەتىن تاۋارلار ءتىزىمىن ازىرلەگەن. سونداي-اق ءبىزدىڭ ەلىمىز يران تاراپىنىڭ دا وسىنداي تاۋارلار ءتىزىمىن قاراستىرۋعا جانە قولداۋعا دايىن. بۇل ەكىجاقتى ساۋدا-ساتتىق كولەمىن 3 ميلليارد دوللارعا دەيىن ارتتىرۋ جونىندەگى ماقساتقا قول جەتكىزۋگە سەپتىگىن تيگىزەدى.
پرەزيدەنت ماۋسىم ايىندا تەگەراندا ەكى ەل باسشىلارى نەگىزىن قالاعان كولىك-ترانزيت ءدالىزىنىڭ تابىستى دامىپ كەلە جاتقانىنا كوڭىلى تولاتىنىن جەتكىزدى.
كەزدەسۋدە ترانزيتتىك جۇك تاسىمالىن ودان ءارى ۇلعايتۋ ماقساتىندا «قازاقستان-تۇرىكمەنستان-يران» تەمىرجول تارماعىنىڭ الەۋەتىن دامىتۋدىڭ ماڭىزدىلىعى، سونداي-اق كاسپيي ماڭى ەلدەرىنىڭ پورتتارى اراسىنداعى تۇراقتى پاروم قاتىناسىنىڭ مۇمكىندىكتەرىن پايدالانۋ قاجەتتىگى اتاپ ءوتىلدى.
قاسىم-جومارت توقايەۆ مادەنيەت سالاسىنداعى ەكىجاقتى بايلانىستاردى نىعايتۋدىڭ ماڭىزدى ەكەنىنە توقتالدى. قازاقستان ەكى ەل حالقى ءۇشىن ماڭىزدى تاريحي تۇلعالارعا قاتىستى بىرلەسكەن زەرتتەۋلەر ۇيىمداستىرۋ جونىندەگى يراننىڭ باستاماسىن قولدادى.
قازاقستان پرەزيدەنتى يراننىڭ شىۇ-عا تولىققاندى مۇشە بولۋعا دەگەن نيەتىن قۇپتادى جانە يسلام رەسپۋبليكاسىنىڭ اتالعان ۇيىمعا قوسىلۋى وڭىرلىك ءوزارا ىس-ارەكەتتى جانداندىرىپ، ونىڭ جۇمىسىنا تىڭ سەرپىن بەرەتىنىنە سەنىم ءبىلدىردى.
ءوز كەزەگىندە يران پرەزيدەنتى ەلدەرىمىزدىڭ ساۋدا-ەكونوميكالىق مۇمكىندىكتەرى مول ەكەنىن، سونداي-اق ىنتىماقتاستىقتى نىعايتۋعا نيەتتى ەكەنىن جەتكىزدى. يبراحيم رايسي قول جەتكىزىلگەن ۋاعدالاستىقتاردىڭ ناتيجەلەرى كەلەشەكتەگى ءوزارا تىعىز ىس-ارەكەتتىڭ بەرىك ىرگەتاسى بولاتىنىنا سەنىم ءبىلدىردى.
كەزدەسۋ سوڭىندا قاسىم-جومارت توقايەۆ قازاقستان يرانمەن اراداعى ىنتىماقتاستىقتى جان-جاقتى نىعايتۋعا بەيىلدى ەكەنىن ايتىپ، يبراحيم ءرايسيدى ەلىمىزگە قارىمتا ساپارمەن كەلۋگە شاقىردى.