پرەزيدەنت ەكولوگيا جانە تابيعي رەسۋرستار ءمينيسترى ەرلان نىسانبايەۆتى قابىلدادى.
كەزدەسۋ بارىسىندا قاسىم-جومارت توقايەۆ جاڭا ەكولوگيالىق زاڭنامانى جۇزەگە اسىرۋعا جانە تابيعي رەسۋرستاردى ساقتاۋعا قاتىستى ءبىرقاتار تاپسىرما بەردى، دەپ حابارلايدى Almaty-akshamy.kz.
پرەزيدەنت ءىرى كاسىپورىنداردىڭ شىعارىندىلارىن ازايتۋ جونىندەگى جوسپاردىڭ ىسكە اسىرىلۋىن، سونداي-اق وسى نىساندارداعى شىعارىندىلارعا مونيتورينگ جاساۋ ءۇشىن اۆتوماتتاندىرىلعان جۇيە ەنگىزۋ ءىسىن ەرەكشە باقىلاۋعا الۋدى تاپسىردى.
مەملەكەت باسشىسى مينيسترلىككە قاراستى ۆەدومستۆولىق ۇيىمداردىڭ ماتەريالدىق-تەحنيكالىق بازاسىن جاقسارتۋ جانە ۇلتتىق پاركتەردەگى ورمان ءورتىنىڭ وشاقتارىن ەرتە انىقتاۋ جۇيەلەرىن تەزىرەك ەنگىزۋ، سونداي-اق ورمان شارۋاشىلىعى قىزمەتكەرلەرىنىڭ بىلىكتىلىگىن ارتتىرۋ جونىندە جۇيەلى شارالار قابىلداۋ قاجەتتىگىن اتاپ ءوتتى. سونىمەن قاتار قاسىم-جومارت توقايەۆ اعاش وتىرعىزۋعا قاتىستى اۋقىمدى باعدارلامانى جۇزەگە اسىرۋ جانە رەتسىز پايدا بولعان قوقىس پوليگوندارى ماسەلەسىن شەشۋدىڭ كەشەندى تاسىلدەرىن ازىرلەۋ ماڭىزدى ەكەنىنە نازار اۋداردى.