مەملەكەت باسشىسى ءماجىلىس پەن جەرگىلىكتى ءماسليحاتتار سايلاۋىندا داۋىس بەردى
مەملەكەت باسشىسى قاسىم-جومارت توقايەۆ ءال-فارابي اتىنداعى وقۋشىلار سارايىندا ورنالاسقان سايلاۋ ۋچاسكەسىنە بارىپ، قازاقستان رەسپۋبليكاسى ءماجىلىسى مەن جەرگىلىكتى ءماسليحاتتار سايلاۋىندا داۋىس بەردى، دەپ حابارلايدى اقوردا.
بۇعان دەيىن حابارلاعانىمىزداي، استانا ۋاقىتىمەن تاڭعى ساعات 4-تە سەۋلدە №258 جانە توكيودا №261 سايلاۋ ۋچاسكەلەرى الەمدە ءبىرىنشى بولىپ اشىلدى.
وڭتۇستىك كورەياداعى ق ر ازاماتى كۋرسانت اسانوۆ ەلنۋر ءبىرىنشى بولىپ داۋىس بەردى.
ق ر كونستيتۋسياسىنا سايكەس، پارلامەنت ءماجىلىسى ارالاس سايلاۋ جۇيەسى بويىنشا كونستيتۋسيالىق زاڭدا بەلگىلەنگەن تارتىپپەن سايلاناتىن 98 دەپۋتاتتان تۇرادى. ءبىرىڭعاي جالپىۇلتتىق سايلاۋ وكرۋگى اۋماعى بويىنشا، ياعني پارتيالىق ءتىزىم بويىنشا ءماجىلىستىڭ 69 دەپۋتاتى، ءبىر مانداتتى اۋماقتىق سايلاۋ وكرۋگتەرى بويىنشا – 29 دەپۋتات سايلانادى.
19 قاڭتاردا مەملەكەت باسشىسى قاسىم-جومارت توقايەۆ جەتىنشى سايلانعان ق ر پارلامەنتىنىڭ ءماجىلىسىن تاراتۋ جانە 19 ناۋرىز كۇنى پارلامەنت ءماجىلىسى دەپۋتاتتارىنىڭ كەزەكتەن تىس سايلاۋىن تاعايىنداۋ تۋرالى جارلىققا قول قويعان ەدى. بۇل كۇنى ماجىلىسپەن قاتار ءماسليحات دەپۋتاتتارىن دا كەزەكتەن تىس سايلاۋ ۇسىنىلدى.
بۇل كۇنى 12 ملن-عا جۋىق ازامات تاڭداۋ جاسايدى. الدىن الا تۇرعىلىقتى جەرى بويىنشا 11 970 406 سايلاۋشى انىقتالدى. سايلاۋشىلاردىڭ ەڭ كوبى – 1 177 507 سايلاۋشى تۇركىستان وبلىسىندا، ال ەڭ ازى – 138 277 سايلاۋشى ۇلىتاۋ وبلىسىندا تىركەلگەن.