وتاندىق بۇقارالىق اقپارات قۇرالدارى ۇلتتىق برەندىمىزدى ىلگەرىلەتۋگە ۇلكەن ۇلەس قوسۋدا. بۇل پىكىردى پرەزيدەنت ب ا ق سالاسىنداعى سىيلىقتار مەن گرانتتاردى تاپسىرۋ كەزىندە ايتتى، دەپ حابارلايدى almaty-akshamy.kz
«بۇگىن ەلىمىز ءوز دامۋىنىڭ جاڭا كەزەڭىنە اياق باستى. وتكەن جىلى جۇرگىزىلگەن رەفورمالار ساياسي جۇيەنى جەتىلدىرۋگە، ءارى قارايعى قايتا قۇرۋلارعا جول اشۋعا مۇمكىندىك بەردى. مەملەكەت، مەديا جانە قوعام اراسىنداعى ءوزارا ءىس-قيمىل ءادىل قازاقستان قۇرۋ ىسىندە بەرىك ىرگەتاس بولۋعا ءتيىس. بۇل ىنتىماقتاستىق اشىقتىق، سەنىم جانە ادالدىق پرينسيپتەرىنە نەگىزدەلۋى كەرەك»، - دەدى مەملەكەت باسشىسى.
پرەزيدەنت بۇقارالىق اقپارات قۇرالدارى قوعامدىق سانانى جاڭارتۋدا، ۇلتتىڭ جاڭا ساپاسىن قالىپتاستىرۋدا شەشۋشى ءرول اتقارۋى كەرەگىن باسا ايتتى.
سوندىقتان جۋرناليستەردىڭ قوعامدا ەڭبەك پەن كاسىپقويلىق كۋلتىن ورناتۋعا، ازاماتتاردىڭ ءوز ەلىنىڭ تاعدىرىنا جاۋاپكەرشىلىكپەن قاراۋىن دامىتۋعا جاردەمدەسۋى ماڭىزدى.
«ول ءۇشىن بەلسەندى پاتريوتيزم مىسالدارىن كورسەتىپ، زامانىمىزدىڭ جالپىۇلتتىق قۇرمەتىنە لايىق شىنايى كەيىپكەرلەرىن تابۋ كەرەك. ءوزىن تولىعىمەن ءوز ىسىنە ارنايتىن، كاسىپكەرلىك پەن تاباندىلىق تانىتاتىن ادامدار كوپشىلىكتىڭ نازارىندا بولۋى كەرەك. وتاندىق بۇقارالىق اقپارات قۇرالدارى ءبىزدىڭ ۇلتتىق برەندىمىزدى ىلگەرىلەتۋگە ۇلكەن ۇلەس قوسۋدا. سىزدەر ەلىمىزدىڭ باي تاريحي-مادەني مۇراسى مەن بىرەگەي تابيعاتىن كورسەتەتىن قىزىقتى ماقالالار مەن شىعارماشىلىق سيۋجەتتەر جاسايسىزدار. بۇل ادامدارعا، ونىڭ ىشىندە شەتەلدىك اۋديتورياعا قازاقستاندى جاقسى بىلۋگە جانە تۇسىنۋگە، ونىڭ الەۋەتىن تولىق باعالاۋعا كومەكتەسەدى»، - دەدى قاسىم-جومارت توقايەۆ.