پرەزيدەنت قاسىم-جومارت توقايەۆ قازان قالاسىندا ءوتىپ جاتقان بريكس-تىڭ پلەنارلىق وتىرىسىنىڭ «بريكس پليۋس»/«اۋتريچ» فورماتىندا ءسوز سويلەدى، دەپ حابارلايدى aqshamnews.kz.
مەملەكەت باسشىسى بريكس ءوزارا ءتيىمدى ىنتىماقتاستىققا نيەتتى كوپتەگەن ەلدىڭ نازارىن اۋداراتىن حالىقارالىق اۋقىمداعى جاھاندىق ورتالىققا اينالىپ كەلە جاتقانىن اتاپ ءوتتى.
– بريكس دامۋ تۇرعىسىنان مول الەۋەتكە يە جانە ءتۇرلى قۇرلىقتاعى مەملەكەتتەردى بىرىكتىرەدى. سونداي-اق ىنتىماقتاستىقتى نىعايتىپ، ورتاق رەسۋرستاردى بارلىق قاتىسۋشىنىڭ يگىلىگىنە ءتيىمدى پايدالانادى. ءوزارا قۇرمەت پەن سەرىكتەستىك، بىرلەسە وركەندەۋ قاعيداتتارىنا نەگىزدەلگەن كەلەشەكتىڭ ىرگەسىن قالاۋعا بريكس-تىڭ تاجىريبەسى دە، مۇمكىندىگى دە جەتەدى، – دەدى پرەزيدەنت.
قاسىم-جومارت توقايەۆتىڭ پىكىرىنشە، بريكس-تىڭ كوپجاقتى كۇش-جىگەرى الەمدە ءالى دە بالاماسى جوق امبەباپ قۇرىلىم سانالاتىن بۇۇ قىزمەتىن تولىقتىرا تۇسەدى.
– بۇۇ جارعىسىنداعى ديپلوماتيا مەن ديالوگ قاعيداتتارى بريكس-تىڭ نەگىزگى كۇن تارتىبىنە اينالدى. ول قاقتىعىستاردى بەيبىت جولمەن رەتتەۋگە جانە ستراتەگيالىق تۇراقتىلىقتى نىعايتۋعا ىقپال ەتىپ وتىر. ءبىز ەۋرازيانىڭ تەڭ ءارى ءبىرتۇتاس قاۋىپسىزدىگىن قامتاماسىز ەتۋگە قاتىستى رەسەيدىڭ تۇجىرىمداماسىن جوعارى باعالايمىز. ونىڭ ءتۇپ نەگىزىندە ءوزارا سەنىم مەن ىنتىماقتاستىقتى نىعايتۋ ارقىلى گەوساياسي قىسىمدى تومەندەتۋ نيەتى جاتىر. قازاقستان قىتايدىڭ حالىقارالىق تۇراقتىلىقتى ساقتاۋ، ەگەمەندىكتى قورعاۋ، قاقتىعىستاردى بەيبىت جولمەن شەشۋ جانە كوپقىرلى تاسىلدەردى قولدانۋ ارقىلى جاھاندىق قاۋىپسىزدىكتى قامتاماسىز ەتۋ باستاماسىن قولدايدى. سونداي-اق ەلىمىز جۇڭگو مەن برازيليانىڭ ۋكراينا جونىندەگى بەيبىت جوسپارىن قۇپتايدى، – دەدى پرەزيدەنت.