پرەزيدەنتكە ەلىمىزدەگى زاڭدىلىقتىڭ جاي-كۇيى جانە قاداعالاۋ قىزمەتىنىڭ باسىم باعىتتارىنا قاتىستى جۇرگىزىلگەن جۇمىستاردىڭ قورىتىندىسى تۋرالى ەسەپ بەرىلدى.
قاسىم-جومارت توقايەۆقا قۇقىقتىق كومەك كورسەتۋ جانە شەتەلدە جاسىرىنعان قىلمىسكەرلەردى ىزدەستىرۋ جونىندەگى حالىقارالىق ىنتىماقتاستىقتىڭ ناتيجەلەرى باياندالدى. ءبىرقاتار رەزونانس تۋدىرعان قىلمىستىق ءىس بويىنشا كۇدىكتىلەر ۇستالىپ، سوت تورەلىگىن جۇزەگە اسىرۋ ءۇشىن قازاقستانعا قايتارىلدى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
مەملەكەت باسشىسىنا اكتيۆتەردى قايتارۋ ماسەلەسى بويىنشا ەۋروپا كەڭەسى، ينتەرپول، ەىدۇ جانە ەقىۇ سياقتى بەدەلدى حالىقارالىق ۇيىمدارمەن ءوزارا تۇسىنىستىككە قول جەتكىزىلگەنى جايىندا مالىمەت بەرىلدى.
بەرىك اسىلوۆتىڭ ايتۋىنشا، ەل ەكونوميكاسىنا 2،7 تريلليون تەڭگە سالعان 220 ينۆەستورعا قۇقىقتىق كومەك كورسەتىلگەن. اتالعان جۇمىستىڭ ناتيجەسىندە ينۆەستورلاردىڭ مەملەكەتتىك بيلىك ينستيتۋتتارىنا دەگەن سەنىمى ارتا ءتۇستى. كەزدەسۋ بارىسىندا تىكەلەي ينۆەستيسيا تارتۋ بويىنشا وڭىرلەردە اتقارىلىپ جاتقان ىستەردىڭ ناقتى ءمان-جايى قاراستىرىلدى.
سونىمەن قاتار پرەزيدەنتكە ەلىمىزدەگى كريمينوگەندىك احۋال جانە قىلمىستىق-قۇقىق سالاسىنداعى ازاماتتاردىڭ كونستيتۋسيالىق قۇقىقتارىن قامتاماسىز ەتۋگە باعىتتالعان شارالار تۋرالى باياندالدى.
كەزدەسۋ سوڭىندا قاسىم-جومارت توقايەۆ ەلىمىزدە زاڭدىلىقتى ودان ءارى نىعايتۋ جانە ازاماتتاردى، سونىڭ ىشىندە كاسىپكەرلەردى قىلمىستىق ەلەمەنتتەردەن قورعاۋ شارالارىن قابىلداۋدى تاپسىردى.
مەملەكەت باسشىسى ينۆەستيسيالىق جوبالارعا قاتىستى ۋاكىلەتتى ورگانداردىڭ شەشىمدەرى بويىنشا «پروكۋرورلىق سۇزگىنى» ءتيىمدى پايدالانۋ ماڭىزدى ەكەنىن ايتتى. وسى ورايدا پرەزيدەنت اتالعان ورگانداردىڭ تارتىلاتىن ينۆەستيسيا تۋرالى دەرەكتەرىنىڭ دۇرىستىعىنا باقىلاۋدى جانە جاۋاپكەرشىلىكتى كۇشەيتۋ قاجەتتىگىنە نازار اۋداردى.
سونداي-اق شەتەلگە زاڭسىز شىعارىلعان اكتيۆتەردى ىزدەۋگە جانە قايتارۋعا باعىتتالعان زاماناۋي تەحنولوگيالاردى كەڭىنەن قولدانۋ كەرەك ەكەنىن اتاپ ءوتتى.