قازاقستان پرەزيدەنتى نيكول پاشينيانعا ريزاشىلىعىن ءبىلدىردى.
قاسىم-جومارت توقايەۆ ەۋرازيالىق ۇكىمەتارالىق كەڭەستىڭ وتىرىسىنا قاتىسۋ ءۇشىن قازاقستانعا كەلگەن ارمەنيانىڭ پرەمەر-مينيسترى نيكول پاشينيانمەن كەلىسسوز جۇرگىزدى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
كەزدەسۋ بارىسىندا ولار ساۋدا-ەكونوميكالىق بايلانىستاردى، سونىڭ ىشىندە ەۋرازيالىق ەكونوميكالىق وداق اياسىنداعى ىنتىماقتاستىقتى نىعايتۋعا باسا نازار اۋدارا وتىرىپ، قازاقستان مەن ارمەنيا اراسىنداعى قاتىناستاردىڭ دامۋ پەرسپەكتيۆالارىن قاراستىردى. تاراپتار حالىقارالىق ۇيىمدار اياسىنداعى ءوزارا ءىس-قيمىلدار مەن ۋكراينا توڭىرەگىندەگى جاعدايدى تالقىلادى.
مەملەكەت باسشىسى ارمەنيا پرەمەر-مينيسترىنە ءىلتيپات ءبىلدىرىپ، ەكىجاقتى ىنتىماقتاستىقتىڭ قارقىندى دامىپ كەلە جاتقانىن اتاپ ءوتتى.
«بيىل ءبىزدىڭ ديپلوماتيالىق قاتىناستارىمىزدىڭ ورناعانىنا 30 جىل. بۇل – وتە ماڭىزدى داتا. ەكى ەل اراسىندا جوعارى دەڭگەيلەردەگى اشىق ساياسي ديالوگ جولعا قويىلعان. پارلامەنتتىك، مادەني-گۋمانيتارلىق بايلانىستارىمىز دامىپ كەلەدى»، – دەدى پرەزيدەنت.
مەملەكەت باسشىسى ارمەنيانىڭ ۇجىمدىق قاۋىپسىزدىك تۋرالى شارت ۇيىمىنداعى ءتوراعالىعىن جوعارى باعالاپ، قاڭتارداعى قايعىلى وقيعالار كەزىندە ۇقشۇ-نىڭ بىتىمگەرلىك كونتينگەنتىن قازاقستانعا جىبەرۋ تۋرالى شەشىمدى قولداعانى ءۇشىن نيكول پاشينيانعا ريزاشىلىعىن ءبىلدىردى.
ءوز كەزەگىندە ارمەنيا ۇكىمەتىنىڭ باسشىسى قوناقجايلىق كورسەتكەنى جانە ەۋرازيالىق ۇكىمەتارالىق كەڭەس وتىرىسىنىڭ جوعارى دەڭگەيدە ۇيىمداستىرىلعانى ءۇشىن العىس ايتتى.
«قازاقستانمەن اراداعى قارىم-قاتىناستارىمىزدىڭ تابىستى دامىپ كەلە جاتقانىنا قۋانىشتىمىن. ءقازىر ەۋرازيالىق ەكونوميكالىق وداق فورماتىندا ەكونوميكالىق ىنتىماقتاستىق پەن ەۋرازيالىق ەكونوميكالىق كەڭىستىكتى ودان ءارى دامىتۋ ماسەلەلەرىن تالقىلاپ جاتىرمىز»، – دەدى نيكول پاشينيان.
سونداي-اق پرەمەر-مينيستر نيكول پاشينيان ۇقشۇ-نىڭ داعدارىسقا قارسى ارەكەت ەتۋ تەتىكتەرىن وڭ باعالاپ، ارمەنيانىڭ ۇيىمعا ءتوراعالىعى اياسىندا وسى ماسەلەگە باسىمدىق بەرىلەتىنىن اتاپ ءوتتى.