مەملەكەت باسشىسىنا الماتىنىڭ بيىلعى ءقاڭتار-ساۋىر ايلارىنداعى ەكونوميكالىق جاعدايى تۋرالى ەسەپ بەرىلدى. وسى كەزەڭدە قىسقا مەرزىمدى ەكونوميكالىق ينديكاتور 107،6 پايىزعا دەيىن كوتەرىلگەن. نەگىزگى كاپيتالعا سالىنعان ينۆەستيسيانىڭ ءوسىمى 21،3 پايىزعا جەتكەن. قاڭتار وقيعاسىنان كەيىنگى قالا ەكونوميكاسىنىڭ ءوسۋ قارقىنى ەكىنشى جارتىجىلدىقتىڭ باسىندا تولىق قالپىنا كەلەدى دەپ بولجانىپ وتىر.
پرەزيدەنتكە الماتىنىڭ 2030 جىلعا دەيىنگى دامۋىنىڭ نەگىزگى باعىتتارىن ايقىندايتىن باسىمدىقتار ۇسىنىلدى.
قاسىم-جومارت توقايەۆقا الەۋمەتتىك ماڭىزى بار ازىق-تۇلىك تاۋارلارىنىڭ باعاسىن تۇراقتاندىرۋ شارالارى تۋرالى مالىمەت بەرىلدى. اتاپ ايتقاندا، ماۋسىم ارالىعىندا ەرتە پىسەتىن كوكونىستەر جەتكىزىلەدى. ال تۇراقتاندىرۋ قورى 11-دەن 15 ميليارد تەڭگەگە دەيىن كوبەيگەن.
مەملەكەت باسشىسىنا زارداپ شەككەن شاعىن جانە ورتا بيزنەس سۋبەكتىلەرىنىڭ شىعىنىن وتەۋ جونىندە بەرگەن تاپسىرمالارىنىڭ ورىندالۋ بارىسى باياندالدى. بۇگىنگە دەيىن قۇنى 13،9 ميلليارد تەڭگە بولاتىن 1556 ءوتىنىش ماقۇلدانعان. زارداپ شەككەن شوب سۋبەكتىلەرىنىڭ 97 پايىزى قاڭتار وقيعاسىنان كەيىن جۇمىسىنا قايتا كىرىسكەن.
پرەزيدەنت جەكەمەنشىك ينۆەستيسيالاردى تارتۋ ءۇشىن الماتىنىڭ يندۋستريالدى ايماعىن كەڭەيتۋ جونىندەگى جوسپارمەن تانىستى.
ەربولات دوسايەۆ قاسىم-جومارت توقايەۆتىڭ قالادا قۇرىلىستىڭ تىعىز بولۋىنا جول بەرمەۋ جانە الەۋمەتتىك ينفراقۇرىلىمدى دامىتۋ جونىندە بەرگەن تاپسىرماسىنىڭ ورىندالۋ بارىسى تۋرالى ايتتى. سونداي-اق مەملەكەت باسشىسىنا الماتىداعى نوسەر جاۋىنعا ارنالعان كارىز جۇيەسىن جاڭعىرتۋدىڭ 2025 جىلعا دەيىنگى باعدارلاماسىنىڭ نەگىزگى ەرەجەلەرى تانىستىرىلدى.
كەزدەسۋ سوڭىندا قاسىم-جومارت توقايەۆ ءبىرقاتار ناقتى تاپسىرما بەردى.