جامبىل وبلىسىنداعى قايعىلى وقيعاعا بايلانىستى مەملەكەت باسشىسىنىڭ اتىنا كوڭىل ايتۋ جەدەلحاتتارى كەلدى.
قاسىم-جومارت توقايەۆتىڭ اتىنا جامبىل وبلىسىنداعى اسكەري قويمادا بولعان جارىلىس سالدارىنان كوپ ادامنىڭ قازا بولۋىنا اكەپ سوقتىرعان قايعىلى وقيعاعا بايلانىستى شەت مەملەكەتتەردىڭ، ۇكىمەتتەر مەن حالىقارالىق ۇيىمداردىڭ باسشىلارىنان كوڭىل ايتۋ جەدەلحاتتارى كەلىپ جاتىر، دەپ حابارلايدى Almaty-akshamy.kz اقورداعا سىلتەمە جاساپ.
رەسەي فەدەراسياسىنىڭ پرەزيدەنتى ۆلاديمير پۋتيننەن، قىرعىز رەسپۋبليكاسىنىڭ پرەزيدەنتى سادىر جاپاروۆتان، تاجىكستان رەسپۋبليكاسىنىڭ پرەزيدەنتى ەمومالي راحموننان، بەلارۋس رەسپۋبليكاسىنىڭ پرەزيدەنتى الەكساندر لۋكاشەنكودان، ارمەنيا پرەزيدەنتى ارمەن ساركيسياننان جەدەلحات كەلدى. سونداي-اق رەسەي فەدەراسياسىنىڭ پرەمەر-مينيسترى ميحايل ميشۋستين، تۇركىتىلدەس مەملەكەتتەر ىنتىماقتاستىق كەڭەسىنىڭ باس حاتشىسى باعدات امىرەيەۆ، شانحاي ىنتىماقتاستىق ۇيىمىنىڭ باس حاتشىسى ۆلاديمير نوروۆ جەدەلحات جولدادى. جەدەلحاتتاردا قازا تاپقانداردىڭ وتباسىلارىنا كوڭىل ايتىپ، قولداۋ بىلدىرگەن. سونىمەن قاتار جاراقات العان ازاماتتاردىڭ تەزىرەك ساۋىعىپ كەتۋىن تىلەگەن.
كوڭىل ايتۋ جەدەلحاتتارى ءالى دە كەلىپ جاتىر.