مەكتەپتەردەگى ەمتيحان مەن «التىن بەلگىگە» قاتىستى وزگەرىستەر ەنگىزىلەدى

وقۋ-اعارتۋ ءمينيسترى عاني بەيسەمبايەۆتىڭ جاڭا بۇيرىعىنىڭ جوباسى ازىرلەندى.

ورىس سىنىپتارىندا وقيتىن بالالاردىڭ مەملەكەتتىك ءتىلدى بىلۋىنە قاتىستى تالاپتار كۇشەيتىلەدى، دەپ حابارلايدى اlmaty-akshamy.kz inbusiness.kz سىلتەمە جاساپ.

مەكتەپتى «التىن بەلگىمەن» بىتىرگەن تۇلەكتەردىڭ باسىم بولىگى مەملەكەتتىك تىلدە سويلەمەيدى. سەبەبى، ورىس مەكتەپتەرىندە ۇزدىك وقيتىن وقۋشىلار قازاق تىلىنەن ەمتيحان تاپسىرعاندا مۇعالىمدەر «التىن بەلگى» ۇمىتكەرلەرىنە كوبىنەسە جۇمساقتىق تانىتادى. وسىعان بايلانىستى وقۋ-اعارتۋ جاڭا ءمينيسترى عاني بەيسەمبايەۆتىڭ جاڭا بۇيرىعىنىڭ جوباسى ازىرلەندى. 2008 جىلعى 18 ناۋرىزداعى №125 بۇيرىققا وزگەرىستەر ەنگىزىلەدى.

«مەملەكەتتىك ءتىلدىڭ مارتەبەسىن ارتتىرۋ ماقساتىندا نەگىزگى ورتا دەڭگەيدە، ياعني 5-8 سىنىپتاردا جانە جالپى ورتا دەڭگەيدە، ياعني 10 سىنىپتا قازاق ءتىلى بويىنشا ەمتيحان ەنگىزىلەدى. اتاپ ايتقاندا، 2023-2024 وقۋ جىلىنان باستاپ، وسى سىنىپتاردا اكادەميالىق جىلدى اياقتاعان كەزدە قازاق تىلىندە وقىتاتىن مەكتەپتەردە – «قازاق ءتىلى» ءپانى بويىنشا، ال ورىس جانە باسقا تىلدەردە وقىتاتىن مەكتەپتەردە – «قازاق ءتىلى مەن ادەبيەتى» ءپانى بويىنشا ەمتيحان ەنگىزىلەدى»، – دەپ قىسقاشا تۇسىنىك بەردى مينيسترلىك.

بۇل ءراسىم 2023 جىلعى 1 قىركۇيەكتەن باستاپ قولدانىسقا ەنگىزىلەدى.

ۆەدومستۆو دەرەگىنشە، مەكتەپتەردىڭ جوعارعى سىنىپتارىنداعى قازاق ءتىلى بويىنشا جاڭا ەمتيحان وقۋ باعدارلاماسىن مەڭگەرۋ قورىتىندىسى بويىنشا جازباشا جانە اۋىزشا نىساندا قاتار وتكىزىلەدى. ونىڭ بارىسىندا ءتىل ۇيرەنۋدى باعالاۋدىڭ جاڭا فورماتتارى قولدانىلادى. مىسالى، ورىس جانە باسقا تىلدە وقيتىن جوعارعى سىنىپ وقۋشىلارى قازاقشا اۋديوجازبانى تىڭداپ، ودان تۇسىنگەنىن اۋىزشا بايانداۋى، ءماتىندى مانەرلەپ وقۋى، جازباشا تاپسىرمالاردى ورىنداۋى شارت.  وسىلايشا، ورىس سىنىپتارىندا وقيتىن بالالاردىڭ مەملەكەتتىك ءتىلدى بىلۋىنە، «التىن بەلگى» ۇمىتكەرلەرىنە قاتىستى تالاپتار كۇشەيتىلەدى.