الماتى اكىمدىگىندە جاڭا وقۋ جىلىنا قالانىڭ ءبىلىم بەرۋ ۇيىمدارىن دايىنداۋ جونىندە جۇمىس كەڭەسى ءوتتى. جيىنعا قالا اكىمى دارحان ساتىبالدى ءتوراعالىق ەتىپ، باسقارمالار مەن اۋدان اكىمدەرى قاتىستى.
باسقوسۋدى اشقان قالا باسشىسى مەكتەپتەر مەن بالاباقشالاردى ۋاقىتىلى ءارى ساپالى دايىنداۋدىڭ باستى مىندەت ەكەنىن ايتتى.
كەڭەستە قالالىق ءبىلىم باسقارماسىنىڭ باسشىسى سايران سايفەدەنوۆ بايانداما جاسادى. ونىڭ ايتۋىنشا، الماتىدا 1 696 ءبىلىم بەرۋ ۇيىمى جۇمىس ىستەيدى. ونىڭ ىشىندە 1 050ء-ى – بالاباقشا، 348ء-ى – مەكتەپ، وندا 565 مىڭنان استام بالا ءبىلىم الىپ جاتىر.
ءقازىر "كەلەشەك مەكتەپتەرى" ۇلتتىق جوباسى اياسىندا 34،2 مىڭ وقۋشىعا ارنالعان 20 جاڭا مەكتەپتىڭ قۇرىلىسى ءجۇرىپ جاتىر. 1 قىركۇيەككە دەيىن 8 جاڭا مەكتەپ اشىلۋعا ءتيىس. تاعى التاۋى تامىز ايىندا اياقتالادى. بۇعان قوسا، جەرگىلىكتى بيۋدجەت ەسەبىنەن 550 ورىندىق ءبىر مەكتەپ سالىنىپ جاتىر. 15 مەكتەپكە كۇردەلى جوندەۋ جۇرگىزىلىپ جاتسا، التاۋى سەيسموكۇشەيتۋ ارقىلى قايتا جاڭارتىلىپ، 4 مەكتەپتە قوسىمشا عيمارات تۇرعىزىلىپ جاتىر.
ءبىرىنشى جانە ونىنشى سىنىپتارعا قابىلداۋ جوسپارلى تۇردە ءجۇرىپ ءجاتىرۇ جاڭا وقۋ جىلىندا 26 099 ءبۇلدىرشىن العاش رەت العاش رەت مەكتەپ تابالدىرىعىن اتتاماق. بۇگىندە ولاردىڭ 18 مىڭنان استامى مەكتەپكە تىركەلىپ ۇلگەردى. 9-سىنىپتى ءتامامداعان 17 840 تۇلەك 10-سىنىپتا وقۋىن جالعاستىرادى. بۇل بىلىمگە دەگەن سۇرانىستىڭ جوعارى ەكەنىن كورسەتەتىن وڭ كورسەتكىش.
قاۋىپسىزدىك ماسەلەسى دە نازاردان تىس قالمادى. قالا مەكتەپتەرىندە 21 مىڭنان اسا بەينەباقىلاۋ كامەراسى، دابىل تۇيمەلەرى، كىرۋدى باقىلاۋ جۇيەلەرى جانە ءورت دابىلدارى ورناتىلعان.
"وقۋ ورىندارىنداعى قاۋىپسىزدىك ەرەكشە باقىلاۋدا"، – دەدى اكىم.
قوسىمشا تۇردە مامان دايارلاۋ، كوللەدجدەردى سيفرلاندىرۋ جانە جاڭعىرتۋ ماسەلەسى قارالدى. بىلىكتىلىكتى ارتتىرۋ باعدارلاماسى اياسىندا 2025 جىلى 5 مىڭنان استام پەداگوگ وقىتۋدان ءوتتى، ونىڭ ىشىندە 400-دەن استامى شەتەلدە ءبىلىم العان. تاعىلىمدامالار ناتيجەسىندە 117 جاڭا ءبىلىم بەرۋ باعدارلاماسى مەن جوباسى ەنگىزىلدى. تەحنيكالىق جانە كاسىپتىك ءبىلىم بەرۋ ۇيىمدارىندا 85 مىڭنان استام ستۋدەنت وقيدى، ولاردىڭ جارتىسىنان استامى مەملەكەتتىك تاپسىرىس بويىنشا ءبىلىم الىپ جاتىر. كوللەدجدەردى جاڭعىرتۋ اياسىندا جاڭا كورپۋستاردىڭ قۇرىلىسى، كۇردەلى جوندەۋ جانە زەرتحانالاردى جابدىقتاۋ كوزدەلگەن.
جيىن سوڭىندا الماتى اكىمى ءبىلىم باسقارماسىنا بارلىق جۇمىسقا باقىلاۋدى كۇشەيتۋدى جانە بەلگىلەنگەن كەستەنىڭ قاتاڭ ساقتالۋىن تاپسىردى.
"ءاربىر نىسان، مەيلى ول جاڭادان سالىنعان مەكتەپ بولماسا جوندەۋدەن وتكەن عيمارات بولسا دا، ۋاقىتىندا ءارى ساپالى تۇردە تاپسىرىلۋى كەرەك. كەشىگۋ مەن سىلتاۋعا جول جوق. ءبىزدىڭ باستى مىندەتىمىز وقۋشىلار مەن مۇعالىمدەر ءۇشىن جاڭا وقۋ جىلىن لايىقتى دەڭگەيدە ۇيىمداستىرۋ"، – دەدى دارحان ساتىبالدى.