باستاۋىش سىنىپ وقۋشىلارىنا بەرىلەتىن تەگىن ىستىق تاماقتىڭ ساپاسىنا ءجوندى قاراماي جۇرگەن مەكتەپتەر ماسەلەسى مينيسترلىك دەڭگەيىندە قارالادى.
بۇل تۋرالى قازاقستاننىڭ ورنىقتى دامۋ سالاسىنداعى ۇلتتىق ماقساتتار مەن مىندەتتەردى ىسكە اسىرۋ مونيتورينگى جونىندەگى پارلامەنتتىك كوميسسيا وتىرىسىندا وقۋ-اعارتۋ ءمينيسترى عاني بەيسەمبايەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ايتا كەتەيىك، 2023-2024 جىلعى وقۋ جىلدارىندا ەلىمىزدە باستاۋىش سىنىپتا وقيتىن 1،4 ملن بالا تەگىن تاماقتانادى. الايدا وقۋ جىلىنىڭ باسىندا مەكتەپ اسحانالارىندا بالالارعا ارنالعان تاماقتىڭ ساپاسىنا قاتىستى اتا-انالار شاعىم ايتا باستادى.
«ەلىمىز اۋماعىندا ىستىق تاماقپەن قامتاماسىز ەتۋ ماسەلەسىن قاداعالاۋ بويىنشا ءتيىستى توپ تەكسەرىپ جاتىر. بارلىق وڭىردە 1-4 سىنىپ وقۋشىلارىنا تەگىن ىستىق تاماقپەن بەرۋگە قاراجات تولىق بولىنگەن. ءبىراق قوعامدا ونىڭ ساپاسىنا جانە تولىقتاي قامتۋعا قاتىستى سۇراقتار قويىلا باستادى. سوندىقتان مونيتورينگ توبى وسى كەمشىلىكتەردى انىقتاپ، بۇل سالاداعى ماسەلەنى مينيسترلىكتىڭ اپپاراتتىق كەڭەسىندە قاراستىرامىز»، - دەدى ع. بەيسەمبايەۆ «قازاقپارات» ءتىلشىسىنىڭ سۇراعىنا جاۋاپ بەرە وتىرىپ.
ونىڭ ايتۋىنشا، مونيتورينگ توبىنىڭ قاداعالاۋ جۇمىستارى 10 قازاندا اياقتالادى.
«كەيبىر ايماقتاردا تالاپتاردى ورىنداماعان جەكەلەگەن مەكتەپتەر انىقتالىپ جاتىر. بۇل تۇرعىدا ولارعا ناقتى شارالار قولدانىلادى. جەرگىلىكتى اكىمدىكتەرگە مەكتەپ اسحانالارىنىڭ جۇمىسىن ءتيىستى دەڭگەيدە ۇيىمداستىرۋ ماسەلەسىنە قاتىستى حات جولدايمىز»، - دەدى مينيستر.