ءبىلىم وشاقتارىندا كوپ بالالى، الەۋمەتتىك وسال توپتاردان شىققان وتباسى بالالارى تەگىن تاماقتانادى. اتالمىش الەۋمەتتىك كومەكتى قالاي الۋعا بولادى؟ كىمدەرگە بەرىلەدى؟
قالالىق ءبىلىم باسقارماسىنىڭ اقپاراتى بويىنشا، ق ر ۇكىمەتىنىڭ قاۋلىسىمەن بەكىتىلگەن «الەۋمەتتىك قورعالماعان ءبىلىم الۋشىلار مەن از قامتىلعان وتباسىلار قاتارىنداعى ءبىلىم الۋشىلارعا قارجىلىق جانە ماتەريالدىق كومەك كورسەتۋگە بولىنەتىن قاراجاتتى جۇمساۋ قاعيدالارىنا» سايكەس ورتا ءبىلىم بەرۋ ۇيىمدارىندا جالپىعا بىردەي وقۋ قورى قۇرىلدى، وعان الەۋمەتتىك قورعالماعان بالالارعا كومەك كورسەتۋ ءۇشىن جەرگىلىكتى بيۋدجەتتەن قاراجات جىبەرىلەدى.
كومەك الەۋمەتتىك جاعىنان قورعالماعان، از قامتىلعان جانە كوپ بالالى وتباسىلاردان شىققان 1–11-سىنىپ وقۋشىلارى ءۇشىن كۇنىنە ءبىر رەتتىك تەگىن تاماقتاندىرۋ تۇرىندە كورسەتىلەدى (ونىڭ قۇنى وسى ساناتتاعى 24 مىڭنان استام وقۋشى ءۇشىن كۇنىنە ورتا ەسەپپەن 700 تەڭگەنى قۇرايدى).
سونىمەن قاتار، قالانىڭ بارلىق مەكتەپتەرى ءۇشىن ورتالىقتاندىرىلعان تۇردە 4 اپتالىق ۇتىمدى تەڭدەستىرىلگەن تەگىن تاماقتانۋ ءمازىرى بەكىتىلەدى. اس ءمازىرى ماۋسىمدىلىق، ءبىلىم الۋشىلاردىڭ جاس ەرەكشەلىكتەرى مەن قاجەتتىلىكتەرىن ەسكەرە وتىرىپ، سونداي-اق ق ر ۇكىمەتىنىڭ قاۋلىسىمەن بەكىتىلگەن تاماقتانۋ نورمالارىنا جانە قازاق تاماقتانۋ اكادەمياسىنىڭ مەكتەپ وقۋشىلارىنىڭ تاماقتانۋ راسيونى بويىنشا ءبىرىڭعاي ستاندارتتار تۇرىندەگى ادىستەمەلىك ۇسىنىمدارىنا سايكەس قۇراستىرىلعىن.
اس ءمازىرى قانداي؟
مەكتەپ اسحانالارىنىڭ راسيونىندا تەك تابيعي ونىمدەر قولدانىلادى: جاڭا پىسكەن كوكونىس سالاتتارى، ءبىرىنشى جانە ەكىنشى تاعامدار، ءسۇت ونىمدەرى، بال، جەمىستەر، شىرىندار، كومپوت پەن كيسەل.
قانداي قۇجاتتار قاجەت؟
رەسمي ءبىلىم باسقارماسىنىڭ اقپاراتى بويىنشا، تەگىن تاماقتانۋدى الۋ ءۇشىن مىناداي قۇجاتتار قاجەت: اتا-انالاردىڭ نەمەسە ولاردى الماستىراتىن ادامداردىڭ نە كامەلەتتىك جاسقا تولعان ءبىلىم الۋشىنىڭ ءوتىنىشى. ول ءبىلىم بەرۋ ۇيىمىنا ونىڭ ءبىرىنشى باسشىسىنىڭ اتىنا جازىلادى.
كىم ءوتىنىش بەرە الادى؟
مەملەكەتتىك اتاۋلى الەۋمەتتىك كومەك الۋعا قۇقىعى بار جانە ااك المايتىن، جان باسىنا شاققانداعى تابىسى ەڭ تومەنگى كۇنكورىس دەڭگەيىنەن تومەن وتباسىلاردان شىققان بالالاردىڭ وكىلدەرى ءوتىنىش بەرە الادى. سونداي-اق، وتباسىلاردا تۇراتىن جەتىم بالالار مەن اتا-اناسىنىڭ قامقورلىعىنسىز قالعان بالالاردىڭ وكىلدەرى، توتەنشە جاعدايلاردىڭ سالدارىنان شۇعىل جاردەمدى تالاپ ەتەتىن وتباسىلاردان شىققان بالالار، ءبىلىم بەرۋ ۇيىمىنىڭ القالى ورگانى ايقىندايتىن ءبىلىم الۋشىلار مەن تاربيەلەنۋشىلەردىڭ وزگە دە ساناتتارى.
العاشقى ەكى سانات (ااك نەمەسە تابىسى ەڭ تومەنگى كۇنكورىس دەڭگەيىنەن تومەن) بويىنشا قىزمەتتى egov «ەلەكتروندىق ۇكىمەت» پورتالى ارقىلى الۋ قاجەت.
تولىق ءتىزىم
سونىمەن، تاماق الۋعا ارنالعان قۇجاتتار ءتىزىمى كەلەسىدەي: اتا-انادان ءوتىنىش، كوپ بالالى – كوك كىتاپشا، جارتىلاي جەتىم – اتا-اناسىنىڭ بىرەۋىنىڭ قايتىس بولۋى تۋرالى كۋالىك، جالعىز باستى انا – 4-فورما، اجىراسقان – نەكەنى بۇزۋ تۋرالى كۋالىك. ەگەر اناسى جۇمىس ىستەسە – جۇمىس ورنىنان سوڭعى 6 ايعا جالاقىسى تۋرالى انىقتاما. ەگەر جۇمىس ىستەمەسە – زەينەتاقى تولەمدەرى تۋرالى انىقتاما. ەگەر اكەسى جۇمىس ىستەسە – سوڭعى 6 ايداعى جالاقىنى ەسەپتەۋ تۋرالى انىقتاما، ەگەر جۇمىس ىستەمەسە – زەينەتاقى تولەمدەرى تۋرالى انىقتاما. ااك الۋشىلار – اكىمدىكپەن شارت، كوپ بالالى وتباسىلار – 6 ايعا جاردەماقى ەسەپتەۋ، جارتىلاي جەتىم بالالار – اسىراۋشىسىنان ايىرىلۋ بويىنشا ەسەپتەۋ، اجىراسقاندار – اليمەنت تۋرالى انىقتاما. بارلىق قۇجاتتاردى ءبىر بالاعا ءبىر دانادان جيناۋ كەرەك. 10 پاراقتان تۇراتىن كوك پاپكانى ۇمىتپاڭىز!