مەكتەپتە العاشقى قوڭىراۋ سالتاناتتى تۇردە وتە مە؟

سالتاناتتى شارا تەك ءبىرىنشى سىنىپ وقۋشىلارى ءۇشىن وتەتىنى ايتىلدى.

سانيتارلىق-گيگيەنالىق تالاپتاردى ساقتاۋ ماقساتىندا سالتاناتتى جيىن تەك ءبىرىنشى سىنىپ وقۋشىلارى ءۇشىن وتكىزىلەدى، دەپ حابارلايدى Almaty-akshamy.kz   Zhetysu Media-عا سىلتەمە جاساپ.

Zhetysu Media مالىمەتتەرىندە ايتىلعانداي، الماتى وبلىسىندا 446 مىڭ وقۋشى مەكتەپ قابىرعاسىندا ءبىلىم الادى دەپ كۇتىلۋدە.  ونىڭ ىشىندە 46،5 مىڭ بوبەك العاش رەت مەكتەپ تابالدىرىعىن اتتاماق.  وقۋ جىلىنداعى باستى ماسەلە – كىتاپ. بيىل ءبىرىنشى سىنىپ وقۋشىلارى ءۇشىن 48 407 وقۋلىق جيىنتىعى ساتىپ الىنعان. «ينفورماتيكا» ءپانى بويىنشا جاڭا وقۋلىقتاردى 3 سىنىپتىڭ 47669 وقۋشىسى، 7 سىنىپتىڭ 43579 وقۋشىسى، 8 سىنىپتىڭ 40902 وقۋشىسى الادى.

ايتا كەتەيىك، وقۋلىقتار 12 باسپادان جەتكىزىلەدى. بارلىق مەكتەپتە ءار سىنىپقا وقۋلىقتاردى بەرۋ ءۇشىن كۇنى مەن ۋاقىتى كورسەتىلگەن.

جاڭا وقۋ جىلىنداعى جاڭالىقتارعا كەلەر بولساق، ءبىرىنشى سىنىپتا «الىپپە»، «انا ءتىلى»، «بۋكۆار»، «ساۋاتتىلىققا وقىتۋ»، «سيفرلىق ساۋاتتىلىق» پاندەرى ەنگىزىلەدى.

 «پاندەمياعا دەيىن مەكتەپ فورماسىن كيۋ مىندەتتى بولدى. ءبىراق وتكەن جىلى بارلىق جاعدايلاردى ەسكەرە وتىرىپ، وقۋشىلارعا مەكتەپكە تەك مەكتەپ فورماسىندا عانا ەمەس، سونىمەن قاتار كلاسسيكالىق ستيلدەگى كيىمدە دە كەلۋگە مۇمكىندىك بەرەتىن شەشىم قابىلداندى. بيىلعى وقۋ جىلىندا تاعى ءبىر جىلعا مەكتەپ فورماسىن كيۋدى مىندەتتى ەمەس ەتۋ تۋرالى شەشىم قابىلداندى. بالالار ۋاقىتشا، تەك كەلەسى وقۋ جىلىندا مەكتەپكە مەكتەپ فورماسىندا عانا ەمەس، سونىمەن قاتار كلاسسيكالىق ستيلدەگى كيىمدە دە بارا الادى»، — الماتى وبلىسى ءبىلىم سالاسىندا ساپانى قامتاماسىز ەتۋ دەپارتامەنتىنىڭ باسشىسى ساۋلە نۇرحان قىزى.