بۇل مەكتەپ فورماسىن شىعارۋ باعىتىنداعى وتاندىق ءوندىرىس كولەمىن ارتتىرۋعا ىقپال ەتەدى
يندۋستريا جانە ينفراقۇرىلىمدىق دامۋ مينيسترلىگىندە «اشىق ساعات الاڭى» شەڭبەرىندە مۇددەلى مەملەكەتتىك ورگاندارمەن بىرلەسىپ از قامتىلعان وتباسىلارعا قارجىلىق جانە ماتەريالدىق كومەك كورسەتۋ قاعيدالارى بويىنشا سيفرلىق پلاتفورمانى ەنگىزۋ ماسەلەلەرى تالقىلاندى، دەپ حابارلايدى Almaty-akshamy.kz.
اتالعان جوبانى مەملەكەت باسشىسى قاسىم-جومارت توقايەۆتىڭ وتاندىق جەڭىل ونەركاسىپتى دامىتۋ اياسىندا مەملەكەتتىك تاپسىرىستاردى مەكتەپ فورماسىن ساتىپ الۋعا باعىتتاۋ تاپسىرماسىنا سايكەس جۇزەگە اسىرۋ كوزدەلىپ وتىر.
يندۋستريالىق دامۋ كوميتەتىنىڭ ءتوراعاسى ءىلياس وسپانوۆتىڭ باسشىلىعىمەن وتكەن كەڭەس بارىسىندا جوبانى ىسكە قوسۋ ماسەلەلەرى قاراستىرىلدى. اتالعان پيلوتتىق جوبانى الدىمەن استانا قالاسىندا، كەيىن ەلىمىزدىڭ بارلىق وڭىرىندە ەنگىزۋ جوسپارلانعان.
«قازىرگى ۋاقىتتا «الەۋمەتتىك ءاميان» پلاتفورماسى ارقىلى اتا-انالارعا بەلگىلى ءبىر دۇكەندەردە مەكتەپ فورماسىن ساتىپ الۋعا كەپىلحات بەرۋ ماسەلەسى قاراستىرىلۋدا. سونداي-اق وتاندىق تاۋار وندىرۋشىلەرگە مەكتەپ فورماسىن ساتۋ ءۇشىن جەڭىلدىكتى شارتتارمەن ساۋدا نۇكتەلەرى ۇسىنىلعانى ءجون. وسىعان بايلانىستى وتاندىق تاۋار وندىرۋشىلەردىڭ ءتىزىلىمىن قالىپتاستىرۋ قاجەت، باستى تالاپتاردىڭ ءبىرى – ۇلتتىق ستاندارتتارعا سايكەس ءونىم ءوندىرىسىن انىقتاۋ»، – دەپ اتاپ ءوتتى ءىلياس وسپانوۆ.
جوبا ناتيجەسىندە بيۋدجەت قاراجاتىن نىسانالى ماقساتى بويىنشا جۇمساۋدىڭ اشىقتىعى قامتاماسىز ەتىلەتىن بولادى. سونداي-اق مەكتەپ فورماسىن شىعارۋ باعىتىنداعى وتاندىق ءوندىرىس كولەمىن ارتتىرۋعا ىقپال ەتەدى.
از قامتىلعان وتباسىلارعا قارجىلىق جانە ماتەريالدىق كومەك كورسەتۋ قاعيدالارى شەڭبەرىندە كيىم، اياق كيىم، مەكتەپ كەرەك-جاراقتارىن ساتىپ الۋعا كومەك اتا-انالاردىڭ وتىنىشىنە سايكەس ەڭ تومەنگى كۇنكورىس دەڭگەيىنەن تومەن ەمەس مولشەردە اقشالاي بەرىلەتىنىن اتاپ وتكەن ءجون.