مەكتەپ دارەتحاناسىنىڭ ماسەلەسى شەشىلمەگەن

ەلىمىزدىڭ كەيبىر وڭىرلەرىندە وسى ماسەلەگە قاتىستى مينيسترلىك تاپسىرماسى تولىعىمەن ورىندالماپتى.

ق ر ءبىلىم جانە عىلىم مينيسترلىگى مەكتەپتەرگە بايلانىستى تاپسىرمالاردى ورىنداماعان تۇلعالارعا قاتىستى شارالار قابىلداۋ ءۇشىن ءبىرقاتار ءوڭىردىڭ اكىمدىكتەرىنە حات جولدادى، دەپ حابارلايدى Almaty-akshamy.kz

ماسەلە مەكتەپ اۋلاسىنداعى دارەتحانالارعا قاتىستى سۇراقتاردى شەشۋ جانە بەينەباقىلاۋ كامەرالارىمەن، دابىل باتىرمالارى جانە قاۋىپسىزدىك جۇيەلەرىنىڭ باسقا ەلەمەنتتەرىمەن قامتاماسىز ەتۋ تۋرالى بولىپ وتىر.

وقۋ جىلىنىڭ باستالۋى قارساڭىندا ق ر بعم ءبىلىم جانە عىلىم سالاسىندا ساپانى قامتاماسىز ەتۋ كوميتەتىنىڭ قىزمەتكەرلەرى ەلىمىزدىڭ بارلىق وبلىسى مەن قالالارىنداعى اكىمدىكتەرگە ۆەدومستۆولىق باعىنىشتى مەكتەپتەردى تەكسەردى.

ينسپەكسيا بارىسىندا تۇركىستان، اقتوبە، الماتى، شىعىس قازاقستان، باتىس قازاقستان، قاراعاندى، قوستاناي وبلىستارىنداعى جانە شىمكەنت قالاسىنداعى مەكتەپتەردە جىلى دارەتحانالارمەن قامتاماسىز ەتۋ بويىنشا كورسەتكىشتىڭ 100%-عا جەتپەيتىنى انىقتالدى. بۇعان دەيىن ۇكىمەت وقۋ جىلىنىڭ باسىندا مەكتەپ اۋلاسىنداعى بارلىق دارەتحانانى جويۋ مىندەتىن قويعان بولاتىن.

سونىمەن قاتار پايدالانىلاتىن جىلى دارەتحانالاردىڭ ەپيدەميولوگيالىق تالاپتارعا سايكەستىگى بويىنشا دا سۇراقتار تۋىندايدى. اتاپ ايتساق، جابىق كابينالار، قولدى جۋۋ جانە كەپتىرۋگە ارنالعان قۇرال-جابدىقتاردىڭ بولۋى جونىندەگى جانە تاعى باسقا تالاپتار. وسىنداي ماسەلەلەردى شەشۋ ءۇشىن ق ر بعم ءبىلىم جانە عىلىم سالاسىنداعى ساپانى قامتاماسىز ەتۋ كوميتەتى سانيتارلىق ەرەجەلەرگە وزگەرىستەر ەنگىزدى.

ايتا كەتەيىك، جەرگىلىكتى اتقارۋشى ورگاندارمەن قىسقا مەرزىمدە 2600-دەن استام جىلى دارەتحانا سالىندى. سونىمەن بىرگە الماتى، شىعىس قازاقستان جانە تۇركىستان وبلىستارىندا بەينەباقىلاۋ كامەرالارىن ورناتۋ بويىنشا ماسەلەلەر تولىق شەشىلمەگەن.