تابيعاتتى تازا ۇستاپ، تۋعان جەردى تۇلەتەيىك! الىپ شاھاردا قالا اكىمى ەربولات دوسايەۆتىڭ باستاماسىمەن «الماتى – ءبىزدىڭ ورتاق ءۇيىمىز» ناۋقانى جالعاسىپ جاتىر. ەكولوگيالىق اكسيا اياسىندا مەگاپوليستەگى بارلىق وقۋ ورنىندا «مەكتەپ اۋلاسىنىڭ ءوازيسى» لاندشافت ديزاينى فەستيۆالى ۇيىمداستىرىلدى. ءبىلىم ورداسىنىڭ الاڭىن كوگالداندىرۋ، ديزاين شىعارماشىلىعىن دامىتۋ ماقساتىندا وتكەن بايقاۋعا الاتاۋ اۋدانىنا قاراستى №178 مامانداندىرىلعان ليسەي وقۋشىلارى ۇلكەن ىقىلاسپەن قاتىستى. ولار “باقىتتى بالالىق شاق”، “كوركەم كوبەلەك”، “قۇستار گۇلزاردا”، “تابيعات سىرى” سىندى بىرنەشە جوبا جاساپ، ليسەي اۋلاسىن ەرەكشە بەزەندىردى. اكسيا اياسىندا وقۋ ورداسىندا “ءالماتى-بىزدىڭ قالا” اتتى سىنىپ ساعاتتارى وتكىزىلدى. سونداي-اق، قوقىستار قورشاعان ورتانى لاستاپ، پوليگوندا ءشىرىپ، تابيعاتتى تۇنشىقتىرماس ءۇشىن ونى قايتا وڭدەۋگە وتكىزۋ ماقساتىندا «قوقىسىڭدى سۇرىپتا» شاراسىن جۇرگىزدى.
الماتىدا «تازا قازاقستان» ەكولوگيالىق اكسياسى اياسىندا «قۇستارعا ءۇي سىيلايىق» شاراسى دا ەرەكشە ۇيىمداستىرىلدى. №178 مامانداندىرىلعان ليسەي وقۋشىلارى بۇل اكسيادا دا بەلسەندىلىك تانىتتى. بىلىمگەرلەر «تەحنولوگيا» ساباعىندا بەرىك ءنابي ۇلىنىڭ جەتەكشىلىگىمەن تابيعي اعاش قالدىقتارىن كادەگە جاراتا وتىرىپ، قۇس ۇيالارىن ءوز قولدارىمەن جاساپ، ونى №95 بالاباقشاسىنىڭ اۋلاسىنداعى اعاشتارعا ورناتتى. وقۋشىلار بۇلدىرشىندەردى تابيعاتتى ايالاۋ مەن قۇستارعا قامقورلىق جاساۋعا شاقىردى.
ايتا كەتەيىك، «مەكتەپ اۋلاسىنىڭ ءوازيسى» لاندشافت ديزاينى فەستيۆالى بارىسىندا قالادا ورىن تەپكەن 215 مەكتەپتىڭ اۋلاسىندا اباتتاندىرۋ جۇمىستارى جۇرگىزىلىپ، ناتيجەسىندە 5-11 سىنىپ وقۋشىلارىنىڭ كومەگىمەن 20 مىڭ گۇل، 430-دان استام جەمىس اعاشتارى، 200-دەن استام تۋي اعاشى وتىرعىزىلدى. ۇزدىك جوبا جەڭىمپازدارى 24 ساۋىردە ستۋدەنتتەر سارايىنداعى وتەتىن «قىزعالداقتار» فەستيۆالىندە ماراپاتتالادى. ال، «قۇستارعا ۇيا سىيلايىق» مەكتەپ چەللەندجى اياسىندا الماتىدا 1 مىڭنان استام قۇس ۇياسى جاسالدى. ولار مەكتەپ اۋلاسىندا، ساياباقتار مەن الاڭداردا ورناتىلدى. «قوقىستى كوفەگە/تاعامعا ايىرباستا» اكسياسى اياسىندا الماتىلىق بالالار مەن ەرەسەكتەر 737 كەلى قايتا وڭدەلەتىن شيكىزاتتى (138 كگ پلاستيك، 95 كگ اليۋمينيي، 210 كگ ماكۋلاتۋرا، 294 كگ شىنى) تاپسىردى.
ەسكە سالايىق، الماتىلىقتار مەن قالا قوناقتارى 8 مامىر، ياعني ناۋقاننىڭ سوڭىنا دەيىن الىپ شاھاردى كوركەيتۋگە بەلسەندى قاتىسا الادى. وسى اپتادا تاۋلاردا، وزەندەر مەن سۋ ايدىندارىنىڭ جاعالاۋلارىندا، سونداي-اق قالانىڭ ساياباقتارى مەن سكۆەرلەرىندە قوقىستاردان جاپپاي تازالاۋ جانە اعاش وتىرعىزۋ وتەدى.
