مەكتەپ ءار بالا ءۇشىن ءقاۋىپسىز جەر بولۋعا ءتيىس

«زورلىق-زومبىلىققا، الىمجەتىككە، ياعني بۋللينگكە، قاتىگەزدىك پەن وزبىرلىققا مۇلدە جول بەرىلمەۋى كەرەك. 

سوڭعى ەكى جىلدا وسكەلەڭ ۇرپاقتىڭ قۇقىعىن قورعاۋ ءۇشىن ناقتى شارالار قابىلداندى. اتاپ ايتقاندا، كامەلەت جاسىنا تولماعاندارعا قاتىستى جاسالعان كەز كەلگەن زورلىق-زومبىلىق ءۇشىن بەرىلەتىن جازا قاتايدى، بالا قۇقىقتارى جونىندەگى ۋاكىلدىڭ قۇزىرەتى كەڭەيدى.

سونداي-اق تاعى ءبىر وزەكتى ماسەلە. بالالاردىڭ وز-وزىنە قول جۇمساۋ جاعدايلارىنىڭ، ياعني ءسۋيسيدتىڭ الدىن الۋ بويىنشا جۇيەلى جۇمىس ىستەلىپ جاتىر. ەلىمىزدەگى بارلىق مەكتەپتە «111» پسيحولوگيالىق قولداۋ قىزمەتىنىڭ QR-كودى ورناتىلدى.

جاڭا وقۋ جىلىنان باستاپ مەكتەپتەر مەن كوللەدجدەردە الىمجەتتىككە، بۋللينگكە قارسى «دوسبولLIKE» اتتى باعدارلاما ىسكە قوسىلادى. نەگىزگى ماقسات – بالالار مەن جەتكىنشەكتەر اراسىنداعى زورلىق-زومبىلىقتىڭ الدىن الۋ. بۇل باعىتتاعى ماڭىزدى جۇمىس توقتامايدى، جاسوسپىرىمدەردىڭ قۇقىعى مەن مۇددەسىن قورعاۋ ماسەلەسى ءاردايىم مەملەكەت نازارىندا بولادى.

«نە ەكسەڭ، سونى وراسىڭ» دەگەن. ءقازىر ءبىز ءبىر قوعام بولىپ جاس ۇرپاقتىڭ بويىنا قانداي قۇندىلىقتاردى سىڭىرسەك، ەرتەڭ ونداعان جىلدان كەيىن ۇلتىمىزدىڭ ساپاسى دا سونداي بولماق. ادىلەتتى، وزىق، تازا، ءقاۋىپسىز جانە قۋاتتى قازاقستاننىڭ ىرگەسى مەكتەپتە قالانادى».