ءىىم ەسىرتكى قىلمىسىنا قارسى ءىس-قيمىل باسقارماسىنىڭ ماماندارى ستۋدەنتتەر مەن وقۋشىلاردى ساق بولۋعا شاقىرادى، دەپ حابارلايدى almaty-akshamy.kz Polisia.kz سىلتەمە جاساپ.
ستۋدەنتتەر اراسىندا جۇرگىزىلگەن ساۋالنامالار ولاردىڭ ەسىرتكى قىلمىسى ءۇشىن بەرىلەتىن جازادان حابارسىز ەكەنىن كورسەتتى. مىسالى، مەفەدرون سياقتى سينتەتيكالىق ەسىرتكىنىڭ 1،5 گرامىن ساتقانى ءۇشىن 7 جىلدان 15 جىلعا دەيىن باس بوستاندىعىنان ايىرۋ جازاسى تاعايىندالادى.
پوليسيا جاتاقحانالاردا رەيدتەر ۇيىمداستىردى.
بىرىنشىدەن، جاتاقحانالاردا تۇراتىن ستۋدەنتتەرگە كەز كەلگەن پسيحواكتيۆتى زاتتاردى قولدانۋدىڭ سالدارى، سونداي-اق ەسىرتكى ساتۋعا قاتىسقانى ءۇشىن جازا تۋرالى ەسكەرتىلەدى.
ەكىنشىدەن، رەيد بارىسىندا كينولوگتار جاتاقحانالاردا ەسىرتكىنىڭ بار-جوعىن تەكسەرەدى. ءبىر اپتا ىشىندە ەلىمىزدىڭ ءارتۇرلى وڭىرىندە ەسىرتكىنىڭ قولدانىلۋىن نەمەسە تارالۋىن انىقتاۋ جانە ەسىرتكى قىلمىسى ءۇشىن جاۋاپكەرشىلىكتى ءتۇسىندىرۋ ءۇشىن كوللەدجدەر مەن جوعارى وقۋ ورىندارىنىڭ جاتاقحانالارىندا قىزمەتتىك-ىزدەستىرۋ يتتەرىن پايدالانا وتىرىپ، وسىنداي 25 رەيد وتكىزىلگەن.
ستۋدەنتتەر مەن جاسوسپىرىمدەر ەسىرتكى ديلەرلەرىنە تەز الدانادى. ولار تاۋەلسىز ءومىردى باستاپ، بوس ۋاقىتىندا اقشا تابۋعا تارىسادى. الايدا جاستار كەز كەلگەن زاڭسىز ارەكەتكە جازا قاراستىرىلعانىن بىلمەيدى. ىشكى ىستەر مينيسترلىگىنىڭ مىندەتى – ءاربىر وقۋشى مەن ستۋدەنتكە وسىنداي تابىستىڭ سالدارى تۋرالى ەسكەرتۋ. 16 جاستان باستاپ ەسىرتكى قىلمىسى ءۇشىن زاڭ الدىندا جاۋاپ بەرۋگە تۋرا كەلەدى، – دەدى ءىىم ەسىرتكى قىلمىسىنا قارسى ءىس-قيمىل دەپارتامەنتى باسشىسىنىڭ ورىنباسارى باقىتجان ءامىرحانوۆ.
ونىڭ ايتۋىنشا، ەسىرتكى جاسىرۋشىلار نەمەسە كۋرەرلەر 7 جىلدان 15 جىلعا دەيىنگى مەرزىمگە باس بوستاندىعىنان ايىرۋ جازاسىن الادى.
ينتەرنەتتە ەسىرتكىنى جارنامالاۋ، ناسيحاتتاۋ، بەلگىلى ءبىر ەسىرتكى تۋرالى فورۋمداردا وڭ پىكىرلەر ءۇشىن 3 جىلدان 6 جىلعا دەيىن باس بوستاندىعىنان ايىرۋ جازاسى قاراستىرىلعان، – دەدى ءىىم وكىلى.