الماتى تەلەارناسى ۇجىمى ءوز كورەرمەنىن تاعى ءبىر جاڭا تۋىندىمەن قۋانتپاق. بۇگىننەن باستاپ «مەدەۋدە كەزدەسەيىك» اتتى تەلەحيكايا كوپشىلىك نازارىنا ۇسىنىلادى، دەپ حابارلايدى Almaty-akshamy.kz Almaty.tv-گە سىلتەمە جاساپ.
سەريال الماتىلىقتار مەن قالا قوناقتارىنىڭ تاپتىرماس دەمالىس ورتالىعىنا اينالعان مەدەۋ مۇز ايدىنىنىڭ 50 جىلدىق مەرەيتويىنا ارنالادى. جاستار اراسىنداعى ماحاببات پەن دوستىق قارىم-قاتىناس باياندالاتىن تەلەحيكايا مەلودراما جانرىندا تۇسىرىلگەن.
مەدەۋ مۇز ايدىنى - تالاي جاستى تانىستىرىپ، تابىستىرعان رومانتيكالىق مەكەن. تەلەحيكايا جەلىسى دە وسى سپورت نىسانىنان باستالادى. بوكستان الەم چەمپيونى، سپورتشى ازات جاتتىعۋ جاساۋ ءۇشىن مەدەۋگە ءجيى بارادى. ال 20 جاستاعى سارا سول كەشەندە جۇمىس ىستەيدى. مەرەكەلىك ءىس-شاراعا دايىندىق كەزىندە ولار تانىسىپ، ارالاسا باستايدى. ەكەۋارا دوستىق كەيىننەن ماحابباتقا ۇلاسادى.
«بۇل پەرسوناجىم باسقالارعا قاراعاندا ەرەكشە. ويتكەنى بۇعان دەيىنگى كەيىپكەرلەرىم كوپ سويلەيتىن، مىنەزى ۇناي بەرمەيتىن.ال بۇل كەيىپكەرىم سالماقتى، سابىرلى بولدى. مەن ەڭ كوپ جىلايتىن سەريال دەسەم بولادى. ءبىزدىڭ توپ سىزدەرگە جاقسى دۇنيە ءتۇسىرۋ ءۇشىن تىرىستىق. باعاسىن وزدەرىڭىز بەرە جاتارسىزدار»، – دەدى اكتريسا گۇليا ۇزاقبايەۆا.
تەلەحيكاياداعى اكتەرلىك قۇرام دا كاسىبي جاساقتالعان. پروديۋسەردىڭ سوزىنشە، سەناريي جەلىسىنە سايكەس كەلەتىن اكتەر تابۋ وڭايعا سوقپاعان. كاستينگ ەكى اي جۇرگىزىلىپتى. دۋلىعا اقمولدا، ايگەرىم جاڭالبايەۆا سەكىلدى تانىمال اكتەرلەرمەن بىرگە سەريالدا اسقار جۇمابەكوۆ، گۇليا ۇزاقبايەۆا، نۇرسۇلۋ ءىزباساروۆا سياقتى جاس تالانتتار دا بوي كورسەتەدى.
«ءتۇسىرىلىم كەزىندە قيىنشىلىقتار كوپ بولدى. كۇن سۋىتىپ كەتتى. مەدەۋدە ادەمى كادرلار الايىق دەسەك، تۇمان ءتۇسىپ كەتەدى. ودان كەيىن جوندەۋ جۇمىستارى، شىمبۇلاقتاعى فۋنيكۋلەر توقتاپ قالادى. بۇل سەريالدا الماتىنى جاڭا قىرىنان كورەسىزدەر، درونمەن تۇسىرىلىمدەر كوپ بولدى»، – دەدى تەلەحيكايا پروديۋسەرى اي-كەرىم سامالبەك قىزى.
تەلەحيكايا - الماتى تەلەارناسىنىڭ ءتول ءونىمى. بۇگىن ساعات 21:00-دە سەريالدىڭ ەكى بىردەي ءبولىمى كورسەتىلەدى. ماحاببات داستانىن دۇيسەنبى مەن جۇما ارالىعىندا ارنامىزدان تاماشالاي الاسىزدار.