ءاز-ناۋرىزدا ايتىلار اق جارما تىلەكتەر قابىل بولىپ، ارمان-مۇراتتارىمىزعا جەتە بەرەيىك
پارلامەنت سەناتىنىڭ ءتوراعاسى ماۋلەن اشىمبايەۆ قازاقستاندىقتاردى ناۋرىز مەيرامىمەن قۇتتىقتادى، دەپ حابارلايدى Almaty-akshamy.kz.
«قۇرمەتتى دوستار!
بارشاڭىزدى ۇلىستىڭ ۇلى كۇنى – ناۋرىز مەيرامىمەن شىن جۇرەكتەن قۇتتىقتايمىن!
ناۋرىز – جاڭارۋ مەن جاڭعىرۋدىڭ باستاۋى. بۇل كۇن ەلدىك پەن ىنتىماقتىڭ، بىرلىك پەن بەرەكەنىڭ مەرەكەسى.
حالقىمىز ءاز-ناۋرىزدى قاشاندا جاقسىلىق پەن جاڭاشىلدىقتىڭ جارشىسى رەتىندە ۇلكەن ۇمىتپەن قارسى الادى. ۇلتىمىزدىڭ ەجەلدەن قالىپتاسقان ءسالت-داستۇرى وسى كۇندەردە كەڭىنەن دارىپتەلەدى.
تىرشىلىك اتاۋلى تۇگەل قايتا جانداناتىن وسىنداي ساتتە ەلىمىزدىڭ دامۋدىڭ جاڭا كەزەڭىنە قادام باسۋى سيمۆولدىق مانگە يە. شىن مانىندە، حالىق مەملەكەت باسشىسىنىڭ جولداۋىن جاڭا قازاقستاننىڭ باستاۋى رەتىندە قابىلداپ جاتىر.
سوندىقتان جاڭا جىلىمىز جاڭا ماقساتتار مەن مىندەتتەر ىسكە اساتىن تابىستى جىل بولادى دەپ ۇمىتتەنەمىز. جىل جاقسىلىعىمەن كەلسىن.
بارشاڭىزدى ۇلىستىڭ ۇلى كۇنىمەن قۇتتىقتاي وتىرىپ، ءار وتباسىنا اماندىق، قۇت-بەرەكە جانە جاڭا جەتىستىكتەر تىلەيمىن!
ءاز-ناۋرىزدا ايتىلار اق جارما تىلەكتەر قابىل بولىپ، ارمان-مۇراتتارىمىزعا جەتە بەرەيىك. ۇلىس وڭ، اق مول بولسىن، اعايىن!»، دەپ جازدى ماۋلەن اشىمبايەۆ Facebook جەلىسىندە.