ق ر پارلامەنتى سەناتىنىڭ ءتوراعاسى ماۋلەن اشىمبايەۆ قازاقستان حالقىن كونستيتۋسيا كۇنىمەن قۇتتىقتادى، دەپ حابارلايدى Almaty-akshamy.kz Inform.kz-كە سىلتەمە جاساپ.
«بارشاڭىزدى كونستيتۋسيا كۇنىمەن شىن جۇرەكتەن قۇتتىقتايمىن!
اتا زاڭ – تاۋەلسىزدىگىمىزدىڭ تىرەگى، مەملەكەتتىلىگىمىزدىڭ نەگىزى، ەلدىگىمىزدىڭ كەپىلى. سوندىقتان بارلىق ءىسىمىزدىڭ قۇقىقتىق باستاۋى سانالاتىن كونستيتۋسيامىزدى ارداقتاۋ – ءار قازاقستاندىقتىڭ ابىرويلى مىندەتى.
بيىل بۇل مەرەكەنىڭ ءمانى بۇرىنعىدان ەرەكشە. مەملەكەت باسشىسى قاسىم-جومارت كەمەل ۇلى توقايەۆتىڭ باستاماسىمەن كونستيتۋسيالىق رەفورما قولعا الىنىپ، حالقىمىزدىڭ باسىم بولىگىنىڭ قولداۋىمەن اتا زاڭعا ماڭىزدى وزگەرىستەر ەنگىزىلدى. سول سەبەپتى، بۇگىنگى مەرەكەنى جاڭا قازاقستاننىڭ تابان تىرەيتىن بەرىك تۇعىرى بولاتىن جاڭارتىلعان كونستيتۋسيامەن اتاپ ءوتىپ جاتىرمىز.
كونستيتۋسيالىق رەفورما قالىپتاسقان ساياسي-قۇقىقتىق جۇيەمىزدى ترانسفورماسيالاۋعا نەگىز بولدى. سوعان بايلانىستى پارلامەنتتىڭ جاڭا سەسسياسىندا قولدانىستاعى زاڭنامانى وسى ىرگەلى وزگەرىستەرگە سايكەستەندىرۋ جۇمىسى قارقىندى جالعاسادى.
كونستيتۋسيا كۇنىمەن قۇتتىقتاي وتىرىپ، ءار شاڭىراققا شاتتىق پەن باق-بەرەكە تىلەيمىن! ەلدىگىمىز باياندى بولسىن! اتا زاڭىمىز مارتەبەلى تۇعىرىنان تۇسپەسىن!»،-دەدى سەنات ءتوراعاسى Facebook پاراقشاسىنداعى جازباسىندا.