سەنات ءتوراعاسى ماۋلەن اشىمبايەۆ كيبەربۋللينگكە قارسى زاڭ جوباسىن ازىرلەۋدە قوعامنىڭ پىكىرىن ەلەۋسىز قالدىرۋعا بولمايتىنىن اتاپ ءوتتى. بۇل تۋرالى ول پالاتا بيۋروسىنىڭ وتىرىسىندا ايتتى، دەپ حابارلايدى almaty-akshamy.kz
بيۋرو مۇشەلەرى الداعى 14 ساۋىردە وتەتىن وتىرىستىڭ كۇن ءتارتىبىن بەكىتتى.
سەناتتىڭ كەزەكتى وتىرىسىندا دەپۋتاتتار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە بالانىڭ قۇقىقتارىن قورعاۋ، ءبىلىم بەرۋ، اقپارات جانە اقپاراتتاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن قارايتىن بولادى.
بۇل قۇجات بالالاردى ولارعا قاتىستى كەز كەلگەن زورلىق-زومبىلىقتان، ونىڭ ىشىندە وتباسىلىق قاتىناستار، ءبىلىم بەرۋ جانە اقپارات سالالارى بويىنشا قورعاۋ تەتىكتەرىن جاقسارتۋعا ارنالعان.
«بالالاردى بۋللينگتەن جانە كيبەربۋللينگتەن قورعاۋ - ماڭىزدى مىندەتتەردىڭ ءبىرى. بۇل زاڭ جوباسىنىڭ كەيبىر نورمالارى قوعامدا قىزۋ تالقىلانعانىن جاقسى بىلەمىن. كەز كەلگەن زاڭ جوباسىن تالقىلاۋ كەزىندە حالىقتىڭ وسىنداي بەلسەندىلىگى ۇلكەن ماڭىزعا يە. قازىرگى تاڭدا سەناتورلار ۇسىنىلعان نورمالاردى مۇقيات زەرتتەپ، بارلىق پىكىردى ەسكەرىپ، جۇمىس ىستەپ جاتىر. باستى مىندەت – بالالاردىڭ قۇقىعىن قورعايتىن ساپالى زاڭ قابىلداۋ. بۇل رەتتە قوعامنىڭ پىكىرىن ەلەۋسىز قالدىرۋعا بولمايتىنى ءسوزسىز. ويتكەنى زاڭ جوباسى «حالىق ۇنىنە قۇلاق اساتىن مەملەكەت» تۇجىرىمداماسىنا قايشى كەلمەۋى كەرەك»، – دەدى ماۋلەن اشىمبايەۆ.
سونىمەن قاتار بەيسەنبىدە وتەتىن جيىن بارىسىندا توتەنشە جاعدايلار ءمينيسترى يۋريي ءيليننىڭ كوكتەمگى سۋ تاسقىنى بويىنشا ەلىمىزدەگى احۋال تۋرالى بايانداماسى تىڭدالادى.
ايتا كەتەيىك، وتكەن اپتادا سەناتور سەرگەي ەرشوۆ وسى تاقىرىپقا بايلانىستى دەپۋتاتتىق ساۋال جولداپ، ەلىمىزدەگى گيدروتەحنيكالىق نىسانداردىڭ جارتىسىنا جۋىعى اپاتتىق جاعدايدا تۇرعانىنا نازار اۋدارعان ەدى. وسىعان وراي سەنات سپيكەرىنىڭ باستاماسىمەن الداعى وتىرىسقا توتەنشە جاعدايلار ءمينيسترىن شاقىرۋ جونىندە شەشىم قابىلداندى.