ماۋلەن اشىمبايەۆ ءابدىجامىل نۇرپەيىسوۆتى تۋعان كۇنىمەن قۇتتىقتادى

بۇگىن قازاقتىڭ كلاسسيك جازۋشىسى ءابدىجامىل نۇرپەيىسوۆتىڭ تۋعان كۇنى

ق ر پارلامەنتى سەناتىنىڭ ءتوراعاسى ماۋلەن اشىمبايەۆ قازاق ادەبيەتىنىڭ كلاسسيگى، قازاقستاننىڭ ەڭبەك ەرى ءابدىجامىل نۇرپەيىسوۆتى تۋعان كۇنىمەن قۇتتىقتادى، دەپ حابارلايدى Almaty-akshamy.kz

«بۇگىن حالىق جازۋشىسى، قازاق ادەبيەتىنىڭ كلاسسيگى، قازاقستاننىڭ ەڭبەك ەرى ءابدىجامىل نۇرپەيىسوۆتىڭ تۋعان كۇنى. سانالى عۇمىرىن جازۋ-سىزۋعا ارناعان اعامىز 97 جاسقا تولىپ وتىر. قالامگەردىڭ عۇمىر جولىنا قاراپ وتىرىپ، ۇلت تاريحىنىڭ وتكەن عاسىرداعى تۇتاس تاراۋلارىن كورۋگە بولادى. ابەكەڭ بالا كۇنىندە تاركىلەۋ، اشارشىلىق سياقتى زوبالاڭداردى باسىنان وتكەردى. ون سەگىزگە تولار-تولماس شاعىندا سوعىسقا اتتاندى. وسىنىڭ ءبارى كەيىن جازۋشىنىڭ شىعارماشىلىعىنا ارقاۋ بولدى. شىن مانىندە، سۋرەتكەردىڭ قالامىنان تۋعان دۇنيەلەر – قازاق ادەبيەتىنىڭ التىن قورىنا قوسىلعان قىمبات قازىنا. ونىڭ ىشىندە «قان مەن تەر» جانە «سوڭعى پارىز» روماندارىنىڭ شوقتىعى بيىك. بۇل شىعارمالار قاشاندا ءار بۋىننىڭ ءسۇيىپ وقيتىن تۋىندىلارى بولىپ قالا بەرەدى»، - دەپ جازدى ماۋلەن اشىمبايەۆ Facebook پاراقشاسىندا.