ولاردىڭ كىناسىنىڭ دارەجەسى مەن جازا ءتۇرىن سوت انىقتايدى.
ق ر ۇلتتىق قاۋىپسىزدىك قىزمەتى باسشىلارىنىڭ السىزدىگى جەكە قۇرامنىڭ رۋحىن ءتۇسىردى. بۇل تۋرالى پارلامەنت ءماجىلىسىنىڭ جالپى وتىرىسىندا ق ر باس پروكۋرورى بەرىك اسىلوۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«اۋماقتىق كۇشتىك ورگاندار باسشىلارىنىڭ بيلىكتى اسىرا پايدالانۋى تۋرالى فاكتىلەرگە جەكە توقتالعىم كەلەدى. جاپپاي تارتىپسىزدىكتەر شەگىنە جەتكەن كەزدە الماتى قالاسى، الماتى وبلىسى مەن قىزىلوردا وبلىسىنىڭ ۇلتتىق قاۋىپسىزدىك كوميتەتى دەپارتامەنتتەرىنىڭ جەكە قۇرامىنىڭ بارلىعى ءوز عيماراتتارىن تاستاپ كەتكەن»، - دەدى ب.اسىلوۆ.
تەرگەۋ مالىمەتى بويىنشا، 5 قاڭتاردا جەكە قۇرامنىڭ عيماراتتان كەتۋگە دايىندالۋى كەرەكتىگى جونىندە ۇلتتىق قاۋىپسىزدىك كوميتەتى ءتوراعاسىنىڭ ورىنباسارى سادىقۇلوۆتىڭ نۇسقاۋى كەلىپ تۇسكەن.
«ءماسىموۆتىڭ تاپسىرماسى بويىنشا الماتى قالاسى مەن قىزىلوردا وبلىسىنىڭ ۇلتتىق قاۋىپسىزدىك كوميتەتى دەپارتامەنتتەرىنىڭ جەكە قۇرامى جۇمىس ورىندارىن تاستاپ كەتكەن. سونداي-اق باسشىلىقتىڭ نۇسقاۋى بويىنشا الماتى جانە جامبىل وبلىستارىنىڭ پوليسيا دەپارتامەنتتەرى ءوز عيماراتتارىن تاستاپ كەتكەن. تۋراسىن ايتقاندا، وسى باسشىلار السىزدىك تانىتتى. بۇل ءوز كەزەگىندە جەكە قۇرامنىڭ رۋحىن ءتۇسىردى. سونىڭ سالدارىنان تارتىپسىزدىكتىڭ جولىن كەسۋ بويىنشا شارالار ۋاقتىلى قابىلدانباعان»، - دەدى باس پروكۋرور.
وسى ورايدا ول الماتى مەن تالدىقورعان ەكى كۇن بويى قارۋلى سودىرلاردىڭ بيلىگىندە بولعانىن ايتتى. ولار قارۋ-جاراقتىڭ ۇلكەن ارسەنالى – 3 مىڭعا جۋىق اۆتومات، پيستولەت، سنايپەرلىك ۆينتوۆكا جانە ون مىڭداي ءوق-دارىنى توناپ كەتتى. ياعني، وسى باسشىلاردىڭ كەسىرىنەن ەڭ ءقاۋىپتى اتىس قارۋلارى بۇلىكشىلەردىڭ قولىنا ءتۇستى. ءالى كۇنگە دەيىن 2 مىڭعا جۋىق قارۋدىڭ قايدا ەكەنى بەلگىسىز. ارنايى پروكۋرورلار بيلىكتى اسىرا پايدالانۋدىڭ وسى فاكتىلەرى بويىنشا تەرگەۋدى اياقتادى. ۇلتتىق قاۋىپسىزدىك كوميتەتىنىڭ ءۇش اۋماقتىق دەپارتامەنتىنىڭ ەكس-باسشىلارى، الماتى وبلىسى پوليسيا دەپارتامەنتىنىڭ بۇرىنعى باستىعى جانە باسقا ادامدارعا قاتىستى قىلمىستىق ىستەر سوتقا جولداندى. ءقازىر سوت تالقىلاۋى بولىپ جاتىر. ولاردىڭ كىناسىنىڭ دارەجەسى مەن جازا ءتۇرىن سوت انىقتايدى»، - دەدى ب. اسىلوۆ.
ونىڭ سوزىنە قاراعاندا، جامبىل وبلىسى پوليسيا دەپارتامەنتىنىڭ ەكس-باستىعىنا قاتىستى قىلمىستىق قۋدالاۋ توقتاتىلدى.