ق ر ۇلتتىق اكادەميالىق كىتاپحاناسىندا ءماشھۇر ءجۇسىپ كوپەي ۇلىنىڭ 165 جىلدىعىنا ارنالعان «دوڭگەلەك ۇستەل» جانە «ءماشھۇر ءجۇسىپتىڭ تىلسىم الەمى» اتتى كىتاپتىڭ تۇساۋكەسەرى ءوتتى.
جيىنعا ءماشھۇر ءجۇسىپتىڭ ۇرپاقتارى، ق ر پارلامەنتىنىڭ سەنات جانە ءماجىلىس دەپۋتاتتارى — التىنبەك نۇح ۇلى، نۇرتورە ءجۇسىپ، جاناربەك ءاشىمجان، امانجول التايەۆ، ءادىل احمەتوۆ جانە عاريفوللا ەسىم، دارحان مىڭباي، قايرات ابۋسەيىتوۆ، ديحان حامزابەك ۇلى سىندى مەملەكەت جانە قوعام قايراتكەرلەرى، سونداي-اق زيالى قاۋىم وكىلدەرى، تاريحشىلار، ءماشھۇرتانۋشىلار، ب ا ق باسشىلارى قاتىستى. پىكىر الماسۋ كەزىندە ۇلى تۇلعانىڭ قازاق تاريحىنداعى جانە رۋحانياتىنداعى ورنى، جاس ۇرپاققا مۇراسىن جەتكىزۋ جولدارى، قوعامدا ناسيحاتتاۋ مەن تىڭ زەرتتەۋلەر جۇرگىزۋ ماسەلەلەرى تالقىلاندى.
«دوڭگەلەك ۇستەل» بارىسىندا «Altyn Qyran Foundation» قوعامدىق قورىنىڭ ءتوراعاسى يسلامبەك سالجانوۆ: «ءبىرتۋار تۇلعا، عۇلاما عالىم ءماشھۇر ءجۇسىپ كوپەي ۇلىنىڭ ەسىمى ءار قازاق ءۇشىن قاستەرلى. «التىن قىران» قوعامدىق قورى ءماشھۇر ءجۇسىپتىڭ شوبەرەسى اباي شاراپييەۆ اعامىزدىڭ كىتابىن باسىپ شىعارۋعا قولداۋ كورسەتتى. بۇل ەڭبەك ءماشھۇرتانۋعا ۇلەس قوسىپ، وقىرمانداردىڭ ىقىلاسىنا يە بولادى دەگەن ۇمىتتەمىز»، — دەپ ءوز ويىمەن ءبولىستى. ءىس-شارادا ۇلى تۇلعانىڭ ءدىني جانە رۋحاني قىرى، عىلىمي جانە ەتنوگرافيالىق ەڭبەگى، ەگەمەندىك پەن ۇلت ازاتتىعى جولىنداعى قىزمەتى، جاڭارۋ، ۇلتتىق بولمىستى دامىتۋ، كاسىپ يگەرۋ تۋرالى ويلارى تارقاتىلىپ ورتاعا سالىندى.
سولاردىڭ ءبىرى ءماشھۇر ءجۇسىپ 1907 جىلى «سارىارقا كىمدىكى؟» اتتى كىتابى شىعىپ، وندا پاتشا ۇكىمەتىنىڭ قازاق جەرىن وتارلاۋ تۋرالى جازىلادى. قازان قالاسىندا بۇل كىتاپتى باسىپ شىعارعان باسپاعا 12 مىڭ سوم ايىپ سالىنىپ، 14 ادام سوتتالادى. ءماشھۇردى تۇتقىنداۋ تۋرالى جارلىق شىققاننان كەيىن ول تۋعان جەرىن تاستاپ، قازاقستاننىڭ وڭتۇستىگىنە قاراي كەتۋگە ءماجبۇر بولادى. بۇعان قوسا ونىڭ «ايقاپ» جۋرنالى مەن «دالا ءۋالاياتى» گازەتىندە ساياسات، ءدىن، شارۋاشىلىق، مەكتەپ پەن ءبىلىم تۋرالى ماقالالارى شىققان ەدى.
جيىندا تۇساۋى كەسىلگەن «ءماشھۇر ءجۇسىپتىڭ تىلسىم الەمى» اتتى كىتاپتا ونىڭ ءومىرى مەن شىعارماشىلىعى كەڭىنەن باياندالادى. كىتاپ بۇرىن-سوڭدى جاريالانباعان ماتەريالدارىمەن قۇندى.