الماتى وبلىسىندا ماس كۇيىندە كولىك باسقارۋدىڭ قايتالانعان 47 فاكتىسى انىقتالىپ، زاڭ بۇزۋشىلار قىلمىستىق جاۋاپكەرشىلىككە تارتىلدى، دەپ حابارلايدى aqshamnews.kz
جىل باسىنان بەرى وبلىس بويىنشا الكوگولدىك جانە ەسىرتكىلىك ماس كۇيدە كولىك باسقارعانى ءۇشىن 768 ادام اكىمشىلىك جانە قىلمىستىق جاۋاپكەرشىلىككە تارتىلعان. بۇل ساننىڭ ىشىندە ماس كۇيىندە رۋلگە قايتا وتىرعان 47 جۇرگىزۋشى ەرەكشە نازارعا ءىلىندى.
پاترۋلدىك پوليسيا مۇنداي بۇزۋشىلاردى انىقتاۋ ءۇشىن ۇنەمى رەيدتىك شارالار ۇيىمداستىرىپ كەلەدى. بۇل جۇمىستاردىڭ باستى ماقساتى – جول قوزعالىسى قاۋىپسىزدىگىن قامتاماسىز ەتۋ جانە قايتالاناتىن قۇقىقبۇزۋشىلىقتاردىڭ الدىن الۋ.
وسىنداي بۇزۋشىلىقتاردىڭ ءبىرى ەڭبەكشىقازاق اۋدانىندا تىركەلدى. 35 جاستاعى ەر ادام 2023 جىلى قازان ايىندا سوت شەشىمىمەن ءومىر بويى جۇرگىزۋشى كۋالىگىنەن ايىرىلعانىنا قاراماستان، قايتادان رۋلگە وتىرعان. پاترۋلدىك پوليسيا ونى ۇستاپ، ساراپتاما ناتيجەسىندە ەسىرتكى قولدانعانىن انىقتادى. سوتتىڭ شەشىمى بويىنشا، ءتارتىپ بۇزۋشى ەكى جىلعا باس بوستاندىعىنان ايىرىلدى.
وڭىردە قۇقىقبۇزۋشىلىقتاردىڭ الدىن الۋ ءۇشىن ارنايى باقىلاۋ شارالارى كۇشەيتىلدى. بۇرىن ماس كۇيىندە كولىك باسقارعان جۇرگىزۋشىلەردىڭ ءتىزىمى پاترۋلدىك پوليسيانىڭ ەرەكشە باقىلاۋىنا بەرىلگەن. "قۇقىقتىق ءتارتىپ" جەدەل-پروفيلاكتيكالىق ءىس-شاراسى ارقىلى ماس جۇرگىزۋشىلەر مەن جاسىرىن ەسىرتكى تۇتىنۋشىلاردى انىقتاۋ جۇمىستارى جالعاسۋدا.
پوليسەيلەر رۋلدە وتىرعان ءار ازاماتتى ءوز قاۋىپسىزدىگى مەن اينالاسىنداعىلاردىڭ اماندىعىنا جاۋاپكەرشىلىكپەن قاراۋعا شاقىرادى. مۇنداي زاڭ بۇزۋشىلىقتار تەك قۇقىقتىق جازانى عانا ەمەس، سونىمەن بىرگە قايعىلى وقيعالاردى دا تۋدىراتىنىن ەسكەرۋ قاجەت. جولدارداعى قاۋىپسىزدىكتى قامتاماسىز ەتۋ – بارلىعىمىزدىڭ ورتاق مىندەتىمىز.