مەديسينا قىزمەتكەرلەرىنىڭ ماۋسىمنىڭ ءۇشىنشى جەكسەنبىسىندە اتاپ وتىلەتىن كاسىبي مەرەكەسى بيىل بۇگىنگە، ياعني 16 ماۋسىمعا سايكەس كەلىپ تۇر.
كارديولوگيا جانە ىشكى اۋرۋلار عزي باسقارما ءتوراعاسى مارات پاشيموۆ وسى ايتۋلى كۇنى ينستيتۋتتىڭ قىزمەتى تۋرالى ايتىپ بەردى، دەپ حابارلايدى Almaty-akshamy.kz
«ءبىز ءۇشىن ءبىزدىڭ ماماندىعىمىز – ءومىر سالتىمىز. مەن جانە مەنىڭ ارىپتەستەرىم ەڭ ىزگى دە جاۋاپتى ماماندىقتاردىڭ ءبىرىن تاڭدادىق. ءبىز كۇن سايىن، ساعات سايىن، مينۋت سايىن قيىن جاعدايلاردا كۇردەلى شەشىمدەر قابىلدايمىز جانە ادامداردىڭ دەنى ساۋ بولۋىنا ىقپال ەتەمىز»، – دەيدى مارات ورىنباسار ۇلى.
كەڭەستىك توراكالدى حيرۋرگ، كارديولوگياداعى يننوۆاسيالىق ادىستەردىڭ اۆتورى نيكولاي اموسوۆ: «مەديسينادان نە تالاپ ەتىلەدى؟ كوپ نارسە قاجەت ەمەس – تەك دۇرىس دياگنوز قويۋ جانە دۇرىس ەمدەۋ»، – دەگەن ەكەن. اتالعان ينستيتۋت دارىگەرلەرى دە وسى ۇدەدەن شىعىپ ءجۇر دەسەك قاتەلەسپەيمىز.
«ءبىزدىڭ دارىگەرلەر ادامدارعا ءتيىمدى كومەك كورسەتەتىنىن اتاپ وتكىم كەلەدى. بىزدە ەلىمىزدىڭ جەتەكشى ماماندارى جۇمىس ىستەيدى، دياگنوستيكادا ءبىز سوڭعى بۋىننىڭ مەديسينالىق جابدىقتارىن قولدانامىز. تەك 2023 جىلى 3D قايتا قۇرۋ جانە كت پەرفۋزياسى مەن تولىق كارديوپاكەتى بار پرەميۋم كومپيۋتەرلىك توموگرافىن؛ 2 ساراپتامالىق ۋلترادىبىستىق جانە ءپورتاتيۆتى ۋلترادىبىستىق اپپاراتتارىن؛ وتتەگى ستانسياسىن؛ توسەك جانىنداعى مونيتورلار؛ يۆل اپپاراتتارىن؛ فۋنكسيونالدى كەرەۋەتتەر؛ حولتەر، قان قىسىمى جانە ەكگ مونيتورينگى جۇيەلەرىن، رەانيماسيالىق بريگادالارعا ارنالعان سانيتارلىق اۆتوكولىك جانە ت.ب.ساتىپ الدىق»، – دەيدى مارات ورىنباسار ۇلى ءسوزىن جالعاستىرىپ.
ءيا، ولار ەل تۇرعىندارىنا جوعارى تەحنولوگيالىق، مامانداندىرىلعان، ستاسيوناردى الماستىراتىن، كونسۋلتاسيالىق-دياگنوستيكالىق مەديسينالىق كومەك كورسەتەدى. سونداي-اق عىلىمي-زەرتتەۋ، ءبىلىم بەرۋ قىزمەتىمەن دە اينالىسادى. ماماندار وڭىرلەردىڭ مەديسينالىق ۇيىمدارىنا ۇيىمداستىرۋشىلىق-ادىستەمەلىك، پراكتيكالىق كومەك كورسەتەدى، دەنساۋلىق ساقتاۋ سالاسىندا ساراپتاما جۇرگىزەدى.
ماڭىزدى داعدىلاردىڭ ءبىرى – كوماندادا جۇمىس ىستەي ءبىلۋ. ويتكەنى پاسيەنتتىڭ ساۋىعۋى مەديسينا قىزمەتكەرلەرىنىڭ بىرلەسكەن كۇش-جىگەرىنىڭ ناتيجەسى ەكەنى ءسوزسىز.
«ءبىز – ءبىر كوماندامىز! كىاعزي – كوپتەگەن جىلدار بويى دياگنوستيكالىق ادىستەردى جەتىلدىرۋگە ۇلەس قوسىپ، اسقازان-ىشەك جولدارىنىڭ پاتولوگياسى بار پاسيەنتتەرگە كومەك كورسەتەتىن جەتەكشى رەسپۋبليكالىق ورتالىقتارىنىڭ ءبىرى. 2023 جىلى ءبىر باللوندى ەنتەروسكوپيا جانە ىشەكتىڭ قابىنۋ اۋرۋلارى كەزىندەگى توق ىشەكتىڭ تارىلۋىن كەڭەيتەتىن باللوندى ديلاتاسياسى سياقتى جاڭا تەحنولوگيالار ەنگىزىلدى. ءبىزدىڭ بازامىزدا دارىگەرلەرگە 3 جانە 4 دەڭگەيدەگى مامانداندىرىلعان كومەك كورسەتەتىن ىشەكتىڭ قابىنۋ اۋرۋلارىن ۇيلەستىرۋ ورتالىعى جۇمىس ىستەيدى: بۇل ءبىلىم بەرۋ ورتالىعى، ەل وڭىرلەرىنىڭ دارىگەرلەرىنە كونسۋلتاسيالىق-ادىستەمەلىك كومەك (تەلەمەديسينالىق كونسۋلتاسيالار) جانە پاسيەنتتەردى امبۋلاتوريالىق ەمدەۋدە كونسالتينگ. ونىڭ باسىندا عىلىمي جانە يننوۆاسيالىق قىزمەت جونىندەگى ورىنباسارىم جاميليا كايبۋللايەۆا تۇر. مەديسينا عىلىمدارىنىڭ كانديداتى، جوعارى ساناتتى گاستروەنتەرولوگ جاميليا احتان قىزى بارلىق وڭىردەن كەلگەن كوپتەگەن پاسيەنتكە كومەكتەسەدى، ماماندارعا ادىستەمەلىك كومەك كورسەتەدى، ەلىمىزدىڭ گاستروەنتەرولوگتارى ءۇشىن ءبىلىم بەرۋ ءىس-شارالارىن ۇيىمداستىرادى جانە بەلسەندى عىلىمي قىزمەت جۇرگىزەدى»، – دەپ اتاپ ءوتتى كلينيكانىڭ ءبىرىنشى باسشىسى.
كارديولوگ دارىگەرلەر – ەرەكشە ادامدار. ولاي دەيتىنىمىز، ولار ومىرلىك ماڭىزدى ورگان ءۇشىن جاۋاپ بەرەدى. وسىنداي دارىگەرلەردىڭ ءبىرى – دەنساۋلىق ساقتاۋ سالاسىندا 30 جىلدان استام جەمىستى ەڭبەك ەتىپ كەلە جاتقان گۇلنارا وسپانوۆا. ول – جوعارى ساناتتى دارىگەر، م.ع.ك.، ەڭ تاجىريبەلى مامانداردىڭ ءبىرى، 15 جىلدان استام ۋاقىت كارديولوگيالىق بەيىندەگى بولىمشەلەردى باسقاردى. بيىل گۇلنارا ەرماحان قىزى اتالعان ينستيتۋتتا ەمدەۋ جۇمىسى جونىندەگى ديرەكتور بولىپ تاعايىندالدى.
اسىلحان پاريمبەكوۆ 16 جىل بويى رەنتگەنحيرۋرگ، ينتەرۆەنسيالىق اريتمولوگ بولىپ جۇمىس ىستەيدى، ونىڭ ىشىندە ينستيتۋتتاعى قولتاڭباسىنا 13 جىل. باسقارما ءتوراعاسىنىڭ ايتۋىنشا، ول كاسىبي دامۋعا ۇمتىلۋ، جوعارى جاۋاپكەرشىلىك سياقتى قاسيەتتەرىمەن ەرەكشەلەنەدى. نوۆوسيبيرسك قالاسىنداعى اكادەميك ە.مەشالكين اتىنداعى ۇلتتىق مەديسينالىق زەرتتەۋ ورتالىعىندا، ماسكەۋ قالاسىنداعى ا.باكۋليەۆ اتىنداعى جۇرەك-قان تامىرلارى حيرۋرگياسى ۇمزو-دا، گەرمانيا، نيدەرلاندى جانە يزرايلدە ءبىلىم العان. 2011 جىلدان باستاپ كلينيكادا جۇرەكىشىلىك ەلەكتروفيزيولوگيالىق زەرتتەۋدى، جۇرەكتىڭ اريتموگەندىك قۇرىلىمدارىنىڭ راديوجيىلىك جانە كريوابلياسياسىن، ەلەكتروكارديوستيمۋلياتوردى، كارديوۆەرتەر-دەفيبريللياتوردى، جۇرەكتى قايتا سينحرونداۋ تەراپياسىنا ارنالعان جۇيەنى يمپلانتاسيالاۋدى ءساتتى جۇرگىزەدى.
مەديسينالىق ستاتيستيكا ءبولىمى – مەكەمە قىزمەتىنىڭ ماڭىزدى قۇرىلىمىنىڭ ءبىرى. جوسپارلاۋدا مەدستاتيستيكا ماڭىزدى ءرول اتقارادى. ستاتيستيكا ارقىلى باسىمدىقتار انىقتالادى جانە رەسۋرستاردى ءبولۋ تۋرالى نەگىزدەلگەن شەشىمدەر قابىلدانادى. سوندىقتان ايناش مالايەۆا باسشىلىق ەتىپ وتىرعان بۇل ءبولىمنىڭ ءرولى دە مەديسينا سالاسى ءۇشىن اسا ەرەكشە.
«بىلتىر ءبىز 5 جىل مەرزىمگە ينستيتۋسيونالدىق اككرەديتتەۋ جانە رەزيدەنتۋرانىڭ 5 ماماندىعى بويىنشا مامانداندىرىلعان اككرەديتتەۋ سەرتيفيكاتتارىن الدىق. كەلەسى ايدا ينستيتۋتتىڭ JCI جوعارى ساپا ستاندارتىنا جانە ۇلتتىق اككرەديتتەۋدىڭ جوعارى ساناتىنا سايكەستىگىن قايتا راستاۋىمىز كەرەك. ماتەريالدىق-تەحنيكالىق بازانى ودان ءارى جاقسارتۋعا؛ وقىتۋعا باسا نازار اۋدارا وتىرىپ، كادرلىق الەۋەتتى كۇشەيتۋگە؛ ەمدەۋدىڭ جاڭا ادىستەرىن ەنگىزۋ جانە جوعارى تەحنولوگيالىق مەديسينالىق قىزمەتتەر كورسەتۋ ءۇشىن وپەراتيۆتىك ارالاسۋ كولەمىن ۇلعايتۋعا ەرەكشە نازار اۋدارىلاتىن بولادى»، دەدى كارديولوگيا جانە ىشكى اۋرۋلار عزي باسقارما ءتوراعاسى مارات پاشيموۆ.