ايگىلى فۋتبول جۇلدىزى!
الەمدە ءوز كۇشىمەن بيىك بەلەستى باعىندىرعاندار از ەمەس. مۇنداي جاندار ءوزىنىڭ ايقىن ماقساتى ارقىلى كوپشىلىككە وزدەرىن دالەلدەيدى. دۇنيە قىزىققا تولى. ونى قىزىق ەتەتىن دە ادام. سونداي جاننىڭ ءبىرى - ارگەنتينالىق مارادونا. بۇل جولى دۇنيە جۇزىنە اتاعى شىققان داڭقتى فۋتبولشى جايلى سىر شەرتەمىز.
- ديەگو مارادونا وتە كەدەي وتباسىندا دۇنيەگە كەلدى. ول جانۇيادا بەسىنشى پەرزەنت بولىپ تۋىلدى. اتا-اناسى قاراپايىم شارۋا ادامدارى بولدى. بىردە وعان جيەن اعاسى دوپ تارتۋ ەتتى. ناق سول كەزدە ونىڭ جاسى 7-دە بولاتىن. مىنە، سول كەزدەن باستاپ، قايدا جۇرسە دە دوپتى جانىنان تاستامادى. ءتىپتى جاتاردا دا قۇشاعىندا ۇستادى.
- مارادونا ويناعان كوماندا وزدەرىن بيىك سەزىنەتىن. ول سول كەزدەگى كۇش-قۋاتىمەن قازىرگى زاماننىڭ فۋتبولىنا اكەلسە دە، باسقالارعا دەس بەرمەيتىن ەدى. مارادونا ءوزىنىڭ كەرەمەت دريبلينگىمەن، سونداي الاسا بويىمەن ءوزىن الاڭدا ەركىن سەزىنەتىن، قارسىلاستارى قانشا قۇلاتقىسى كەلسە دە، ءوزىنىڭ شىنىققان دەنەسىمەن باسىپ ءوتىپ كەتەتىن. مارادونا اسا مىقتى بومباردير ەمەس، ءبىراق ونىڭ ءار سالعان گولى ماڭىزدى جانە ويىندى شەشىپ وتىرعان.
- نەبارى 10 جاسىندا ارگەنتينانىڭ «لوس سەبولليتوس» دەپ اتالاتىن بالالار كلۋبىنا مۇشەلىككە وتەدى. ديەگو فۋتبول كورولى پەلە سەكىلدى الاڭعا ىرىمداپ 10 ءنومىرلى فۋتبولكامەن شىقتى. سپورتتىڭ وسى سالاسىنا قۇمارتقاندىعى سونشالىق، 14 جاسىندا وقۋىن جالعاستىرۋدان باس تارتىپ، ۋاقىتىنىڭ بارلىعىن فۋتبولعا ءبولدى.
- 1986 جىلعى مەكسيكاداعى جارىستا ارگەنتينانىڭ جەڭىسى ديەگو مارادونانىڭ ەسىمىمەن تىكەلەي قاتىستى. «ءبىر عانا اكتەردىڭ تەاترى» اتالىپ كەتكەن چەمپيوناتتا مارادونانىڭ قۇراماسىنا تيگىزگەن پايداسى ۇشان-تەڭىز. جەتى ماچتا قارسىلاستارىنىڭ قاقپاسىنا بەس دوپ سالدى. وسىلايشا، قۇبىلىس جاسادى دەۋگە بولادى.
- ايگىلى فۋتبولشى - اتى اڭىزعا اينالعان تۇلعا. ونىڭ قاتىسقان ماچتارى قىزىق بولعاندىعى سونشالىق، ءتىپتى جانكۇيەرلەردىڭ بىر-بىرىمەن توبەلەسىنە الىپ كەلەتىن. سونداي-اق، «التىن دوپتىڭ تۇڭعىش يەسى» اتاندى. ءسويتىپ، «سان ديەگو» دەگەن لاقاپ اتتى يەلەندى، ماعىناسى - اۋليە ديەگو. بۇگىنگى كۇنگە دەيىن كۇللى الەمنىڭ الدىندا سۇيىكتى فۋتبولشى اتاعىمەن تاريحتا قالدى.