الماتى اكىمدىگى «الماتى – ادامدار ءۇشىن جاھاندىق قالا» باعدارلاماسىن ازىرلەدى، وندا مەگاپوليستى 2025 جىلعا دەيىن دامىتۋدىڭ نەگىزگى باسىمدىقتارى مەن 2030 جىلعا دەيىنگى ورتا مەرزىمدى پەرسپەكتيۆالار كورسەتىلگەن. قالا تۇرعىندارى باعدارلامامەن تانىسىپ، ءوز ۇسىنىستارىن «الماتىنى دامىتۋ ورتالىعىنىڭ» سايتىندا 2022 جىلدىڭ 1 شىلدەسىنە دەيىن قالدىرا الادى.
اباي اتىنداعى قازۇپۋ وقىتۋشىسى ماقسات جاقاۋوۆ 2025-2030 جىلدارعا 50-100 پايىزبەن مەكتەپ اۆتوبۋستارىمەن قامتاماسىز ەتۋ باستامالارى دۇرىس جاسالعانىن ايتتى، دەپ حابارلايدى almaty-akshamy.kz almaty.tv سىلتەمە جاساپ.
«الماتى قالاسىنىڭ بىردەن-بىر ۇلكەن ماسەلەسى، كوشەلەردەگى جول كەپتەلىستەرى. ەگەر قالا جوسپارىنداعىداي، مەكتەپ اۆتوبۋستارىن ەنگىزەتىن بولسا، كوشە تىعىندارىنىڭ 15 پايىزعا ازايىپ، جۇرت دىتتەگەن جەرىنە قينالماي بارۋشى ەدى. سەبەبى كوپ مەكتەپتەر قالا ورتالىقتارىندا بولعان سوڭ، بالاسىن مەكتەپكە ءوز كولىكتەرىمەن اتا-انالارى اپارىپ جاتادى. سوندىقتان، 2025-2030 جىلدارعا 50-100 پايىزبەن مەكتەپ اۆتوبۋستارىمەن قامتاماسىز ەتۋ باستامالارى دۇرىس. بۇل - ءبىلىم سالاسىنداعى جاڭالىقتاردىڭ ءبىرى»، – دەدى ماقسات جاقاۋوۆ.
ونىڭ ايتۋىنشا، ال ءدۋالدى جۇيەمەن ارنايى كوللەدجدەردىڭ ءبىلىم الۋشىلارىن جۇمىس بەرۋشىلەردىڭ مەكەمەلەرىندە كاسىبي تاجىريبەسىمەن قاتار وتكىزۋگە قول جەتكىزۋ، بۇل الەمدىك پراكتيكانىڭ ۇلگىسىندە ءجۇرۋ دەگەن ءسوز. 18 ماماندانعان ورتالىقتىڭ قۇرىلۋى، قىسقا مەرزىمدەگى NEET جاستارىنا قايتا دايارلاۋ كۋرستارىن كەڭىنەن جۇرگىزۋ كوپتەگەن الەۋمەتتىك ماسەلەلەردى شەشىپ، جۇمىسپەن قامتۋ دەڭگەيى ەداۋىر وسەدى.
«الماتى قالاسىندا 250 مىڭعا جۋىق ستۋدەنت وقيدى، سونىڭ 60 پايىزى شالعايدان كەلىپ وقيتىندار. ولارعا البەتتە جاتاقحانا جەتىسپەيدى. قالا جوسپارى بويىندا 2025 جىلعا دەيىن 12 مىڭدىق، 2030 جىلعا دەيىن 20 مىڭدىق ورىندىق جاتاقحانامەن قامتۋ ارينە، كۇردەلى دە ءبىراق وتە قاجەت قادامدار. ەگەر ستۋدەنتتەرگە قولجەتىمدى جاتاقحانا ورىندارى بولسا، اتا-انالار دا تىنىش، ۋنيۆەرسيتەتتەردىڭ دە ۋايىمى ازايار ەدى»، – دەدى ول.
ايتا كەتەيىك، الماتى اكىمدىگى «الماتى – ادامدار ءۇشىن جاھاندىق قالا» باعدارلاماسىن ازىرلەدى. جوبا جەتى بولىمنەن تۇرادى، ولار: «جايلى قالالىق ورتا»، «تۇراقتى ەكونوميكالىق ءوسۋ»، «باسقارىلاتىن ۋربانيزاسيا»، «الەۋمەتتىك ورنىقتىلىق پەن تۇراقتىلىق»، «جاسىل الماتى»، «سمارت سيتي»، «ءقاۋىپسىز قالا».
الماتىنى كەڭىستىكتىك دامىتۋدىڭ نەگىزگى مىندەتى – جايلى قالالىق ورتا قۇرۋ جانە قالانىڭ بارلىق اۋداندارىندا ءومىر ءسۇرۋ ساپاسىن ارتتىرۋ. ول ءۇشىن ءۇش باسىم باستاما ايقىندالدى: الماتىنى كوپورتالىقتى دامىتۋ، قوعامدىق كولىكتىڭ دامىعان جۇيەسى جانە اۋدانداردىڭ بايلانىستىلىعى، جاڭا تاريفتىك ساياساتتى ەنگىزۋ جانە شىعىنداردى ازايتۋ ارقىلى تكش قىزمەتتەرىنىڭ ساپاسىن جاقسارتۋ.