وڭىردەگى گاز وڭدەۋ زاۋىتى سۇرانىستى قامتاماسىز تەۋگە شاماسى جەتپەي وتىر
مەملەكەت باسشىسى ۇكىمەتكە جاڭاوزەندەگى جاعدايدى تەزىرەك رەتتەۋدى تاپسىردى، دەپ حابارلايدى Almaty-akshamy.kz «حابار 24» تەلەارناسىنا سىلتەمە جاساپ.
كەشە جاڭاوزەن تۇرعىندارى گاز باعاسىنىڭ كوتەرىلۋىنە بايلانىستى نارازىلىق بىلدىرگەن ەدى. وسى جاعدايعا قاتىستى قاسىم-جومارت توقايەۆ ءوزىنىڭ تۆيتتەردەگى پاراقشاسىندا جازبا قالدىردى.
«ۇكىمەتكە جاڭاوزەندەگى جاعدايدى ەكونوميكالىق تۇرعىدان ەسكەرىپ، قۇقىقتىق جاعىنان تەز ارادا قاراستىرۋدى تاپسىردىم. شەرۋگە شىققاندار قوعامدىق ءتارتىپتى بۇزباۋى ءتيىس»، - دەپ جازدى پرەزيدەنت.
پرەزيدەنت ودان سوڭ «ازاماتتاردىڭ جەرگىلىكتى جانە ورتالىق بيلىك ورگاندارىنا تالابىن اشىق ايتۋعا قۇقىعى بار، ءبىراق، بۇل زاڭعا، ناقتىراق ايتقاندا، بەيبىت شەرۋلەر تۋرالى زاڭعا سايكەس جۇزەگە اسىرىلۋى كەرەك» دەپ اتاپ وتكەن.
تاياۋدا وڭىردە 1 قاڭتاردان باستاپ گاز قىمباتتادى دەگەن اقپارات تاراعان. جۇرت وسىعان بايلانىستى سۇيىق وتىننىڭ باعاسىن 60 تەڭگەگە دەيىن تومەندەتۋدى تالاپ ەتكەن. ماڭعىستاۋ وبلىسى اكىمدىگىنىڭ مالىمدەۋىنشە وڭىردەگى جالعىز گاز وڭدەۋشى زاۋىت ايىنا 14،5 مىڭ توننا سۇيىتىلعان گاز وندىرەدى. ءبىراق قازىرگى قاجەتتىلىك 18 مىڭ توننا بولعاندىقتان سۇرانىستى قامتۋعا شاماسى جەتپەيدى. وسىعان بايلانىستى قوسىمشا 3،5 مىڭ توننا گاز جەتكىزىلەدى.